اسلام آباد :وزیر اعظم کے معاون خصوصی برائے قومی صحت ڈاکٹر فیصل سلطان نے ایک بار پھر لوگوں پر زور دیا ہے کہ کورونا کے پھیلاؤ پر قابو پانے کے لئے احتیاطی تدابیر پر سختی سے عمل کریں۔
منگل کے روز اسلام آباد میں میڈیا سے گفتگو کرتے ہوئے انہوں نے کہا کہ کورونا کی دوسری لہر میں شدت آرہی ہے، گذشتہ چوبیس گھنٹوں کے دوران 89 افراد کوروناوائرس سے ہلاک ہوگئے ہیں۔
معاون خصوصی نے کہا کہ ماسک اور معاشرتی دوری سے ہم پہلی لہر کی طرح دوسری لہر پر بھی قابو پاسکیں گے۔
دوسری طرف پاکستان میں کورونا وائرس سے گذشتہ 24 گھنٹوں میں 89 اموات کی اطلاع ملی ہے جبکہ مثبت کیسزکی تعداد بڑھ کر 423179 ہوگئی ہے۔ ملک بھر میں اموات کی تعداد 8487 ہوگئی ہے۔
نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں میں 2885 افراد نے کورونا کامثبت تجربہ کیا۔
وبائی مرض سے سندھ سب سے زیادہ متاثرہ صوبہ ہے جس کے بعد پنجاب ، خیبر پختونخوا اور اسلام آباد ہیں جبکہ سب سے زیادہ ہلاکتوں میں پنجاب سندھ سے آگے نکل گیا ہے۔
گوگل نیوز پر ہمیں فالو کریں
