کراچی میں گرمی کے دوران ربڑی والی مزیدار لسی سے تازگی پائیں

کراچی کے کھانے تو پورے ملک میں مشہور ہیں ہی لیکن شہر قائد کے مشروبات بھی اپنی مثال آپ ہیں، کراچی کی چلچلاتی گرمی میں ٹھنڈے مشروبات جسم کو راحت بخشتے ہیں اور جب بات لسی کی ہو تو ٹھنڈی فرحت بخش لسی گرمی میں بھی آپ کو تروتازہ کردیتی ہے، دودھ ،دہی ، چینی اورنمک سے تیار کردہ فرحت بخش لسی گرمی میں اپنے ذائقے اور تاثیر کی وجہ سے شہریوں کو بھرپور لطف دیتی ہے۔کراچی میں آپ کو ہر علاقے میں فرحت بخش لسی باآسانی مل جائیگی لیکن شہر قائد میں اجمیری دل بہارلسی ہاؤس کا اپنا ایک الگ ہی مقام ہے۔اب یہاں آپکےذہن میں یہ سوال ضرور پیدا ہوگا کہ یہ لسی الگ کیسے تو اس کا جواب ہے کہ اس لسی کو سب سے منفرد بناتا ہے اس کا ذائقہ کیونکہ اس میں روایتی اجزاء کے علاوہ ربڑی بھی شامل کی جاتی ہے جو اس کو سب سے الگ بناتی ہے۔

سعود آباد کے علاقے میں واقع اجمیری دل بہارلسی ہاؤس سے گزشتہ 50 سے 60سے شہریوں کو مزیدار لسی فراہم کی جارہی ہے،یہاں لسی کی کئی اقسام ہیں لیکن زیادہ مانگ نمکین اور میٹھی لسی کی ہے اوردہی، پھلوں اور ربڑی کے امتزاج سے ذائقہ دار لسی بنائی جاتی ہے۔یہاں لسی گلاس کے علاوہ پیالے میں بھی پیش کی جاتی ہے اور ساتھ میں ایک چمچ دیا جاتا ہے کہ اگر آپ کو لسی پینی ہے تو پئیں اور اگر ربڑی کھانی ہے تو وہ کھائیں اور مزیدار بات تو یہ ہے کہ یہاں ذائقہ دار فرحت بخش لسی صرف 80 روپے کے حساب سے پیش کی جاتی ہے۔