منظوری لی نہ کنسلٹنٹ کی خدمات، حکومت نے سرکلر ریلوے کے نام پر بیوقوف بنادیا،اویس قادر شاہ

کراچی:وزیر ٹرانسپورٹ سندھ اویس قادر شاہ نے دعویٰ کیا ہے کہ کراچی سرکلر ریلوے منصوبے کی کسی فورم نے منظوری نہیں دی اور نہ ہی کسی کنسلٹنٹ کی تاحال خدمات لی گئی ہیں،حکومت کے سی آرکے نام پرکسی اے ٹی ایم کو فائدہ پہنچانا چاہتی ہے۔

وزیراعظم کے دورے کراچی اور کے سی آر کے افتتاح پرردعمل دیتے ہوئے اویس شاہ نے کہاکہ کراچی سرکلر ریلوے کے سروے میں بھی دو سال تک لگ سکتے ہیں،یہ کراچی سرکلر ریلوے کا انفر اسٹرکچر نہیں ہے۔

صوبائی وزیر نے کہا کہ تباہی سرکار کا قومی خزانے کو تباہ کرنے اور کراچی والوں کی آنکھوں میں دھول جھونکنے کے مترادف ہے۔ جب نئی کے سی آر بنے گی تو یہ اسٹرکچر کام نہیں آئیں گے۔

مزید پڑھیں:الیکٹرانک ووٹنگ مشینوں پرحکومت اور الیکشن کمیشن جلد ایک پیج پر ہونگے، شیخ رشید

اویس شاہ نے کہاکہ کے سی آرکے نام پرتباہی سرکار کسی اے ٹی ایم کو فائدہ پہنچانا چاہتی ہے، 20 ارب روپے کا کے سی آر کے نام پر انفراسٹریکچر بناکر ضائع کیا جائے گا۔

اویس شاہ نے پی ٹی آئی حکومت سے سوال کرتے ہوئے کہا کہ جب میگا منصوبے کے سی آر کی ایکنک سمیت کسی متعلقہ فورم نے منظوری ہی نہیں دی تو پھرسنگ بنیاد کس چیز کا ہے۔

انہوں نے کہا کہ کراچی کے لوگوں کے ساتھ اتنا مذاق بنایا جارہا ہے،عمران خان اس منصوبہ کو ضائع کررہے ہیں ان کو کچھ علم ہی نہیں ہے، گھوڑے کی دم بنانے تو جارہے ہیں مگر گھوڑا کہاں ہے،یہ کسی اے ٹی ایم کو فائدہ پہنچایا جارہا ہے،تباہی سرکار نے تباہی کے سوا کچھ نہیں کیا۔