فارن فنڈنگ کیس، پی ٹی آئی کے پاس چھپانے کیلئے کچھ نہیں۔علی زیدی

کراچی: تحریکِ انصاف سندھ کے صدر و سابق وزیرِ بحری امور علی زیدی نے کہا ہے کہ فارن فنڈنگ کیس میں پی ٹی آئی کے پاس چھپانے کیلئے کچھ نہیں۔ افسوس اس بات کا ہے کہ الیکشن کمیشن تحریکِ انصاف کے پیچھے پڑ گیا۔

تفصیلات کے مطابق اپنے ایک بیان میں صدر پی ٹی آئی سندھ علی زیدی نے کہا کہ پیپلز پارٹی اور ن لیگ کے غیر ملکی اور ممنوعہ فنڈنگ کیسز کی بھی تحقیقات کی جائیں۔ انہوں نے لوٹی ہوئی دولت سے اربوں روپے اپنے سیاسی ایجنڈے کیلئے استعمال کیے ہیں۔

یہ بھی پڑھیں:

ملک میں مہنگائی کے متعلق تکلیف دہ فیصلے کرنے ہونگے۔شاہد خاقان عباسی

بیان میں سابق وزیرِ بحری امور علی زیدی نے کہا کہ  پی ٹی آئی نے پاکستان کی سیاست میں پبلک فنڈ ریزنگ اور کلاؤڈ فنڈنگ ​​کا تصور متعارف کرایا۔ پی پی اور ن لیگ لوٹی ہوئی دولت سے ووٹوں کی خریداری کرتے ہیں جبکہ تحریکِ انصاف اپنے اکاؤنٹس کا آڈٹ کراتی ہے۔ 

صدر پی ٹی آئی سندھ نے کہا کہ پی ٹی آئی اکاؤنٹس کا باقاعدگی سے  اے گریڈ کی بیرونی آڈٹ فرم کے ذریعے آڈٹ کیا جاتا ہے۔ ہماری خوش نصیبی ہے کہ ہمیں عمران خان جیسا لیڈر ملا۔  عمران خان واحد سیاسی لیڈر ہیں جن پر عوام اعتماد کرتے ہیں۔ 

سابق وفاقی وزیر علی زیدی نے کہا کہ عمران خان واحد سیاسی لیڈر ہیں جنہیں اعلیٰ عدلیہ نے صادق اور امین قرار دیا۔ پی ٹی آئی کے پاس چھپانے کے لیے کچھ نہیں ہے۔ ای سی پی کی سکروٹنی کمیٹی نے یہ کہا کہ درخواست گزار نے الزام ثابت کے لیے کوئی ثبوت فراہم نہیں کیا۔

تحریکِ انصاف سندھ کے صدر نے کہا کہ ن لیگ اور پیپلز پارٹی مالی تفصیلات کیوں فراہم نہیں کررہے؟  یہ دونوں پارٹیاں الیکشن کمیشن اور عوام سے کیا چھپا رہی ہیں؟  یہ ڈھکی چھپی بات نہیں کہ دونوں نے لوٹی ہوئی دولت کو لانڈر کرنے کے لیے اپنی پارٹیوں کا استعمال کیا۔