پیٹرولیم مصنوعات کی بڑھتی ہوئی قیمتوں پر آصف علی زرداری کا اظہارِ تشویش

کراچی: پاکستان پیپلز پارٹی کے شریک چیئرمین و سابق صدرِ مملکت آصف علی زرداری نے پیٹرولیم مصنوعات کی بڑھتی ہوئی قیمتوں پر تشویش کا اظہار اور حکومت کو عوام کو ریلیف دینے کا مشورہ دیا ہے۔

تفصیلات کے مطابق سابق صدر آصف علی زرداری نے اپنے حالیہ بیان میں کہا کہ پیپلز پارٹی اتحادی حکومت کا ساتھ دے رہی ہے تاہم اس قسم کے فیصلوں پر مشاورت ضرور کرنی چاہئے۔ عوام کو ریلیف دینا چاہتے ہیں۔

یہ بھی پڑھیں:

فوجی جوانوں پر حملہ کرنے والے دہشت گرد ناقابل معافی ہیں، آصف زرداری

پی پی پی کے شریک چیئرمین آصف زرداری نے کہا کہ ہم سب اتحادی حکومت کا حصہ بن کر عوام کو ریلیف دینے آئے، ریلیف دینا ہی ہماری اوّلین ترجیح ہونی چاہئے۔ وزیر اعظم شہباز شریف کے ساتھ کھڑے ہیں۔

سابق صدر آصف علی زرداری نے مسلم لیگ (ن) کے صدر و موجودہ وزیر اعظم شہباز شریف سے جلد ملاقات کا عندیہ دیتے ہوئے کہا کہ میں وفاقی حکومت کی معاشی ٹیم کے متعلق بھی تبادلۂ خیال کروں گا۔

خیال رہے کہ اس سے قبل سابق صدر آصف علی زرداری نے شمالی وزیرستان میں پاک فوج کے جوانوں پر خودکش حملے کی مذمت کی اور نیشنل ایکشن پلان کے تحت دہشت گردوں کا صفایا کرنے کا مطالبہ کیا۔

سابق صدر آصف علی زرداری نے فوج کے جوانوں کی شہادت پر افسوس اور گہرے رنج و غم کا اظہار کرتے ہوئے کہا کہ فوج کے جوانوں پر حملہ کرنے والے دہشت گرد ناقابل معافی ہیں۔نیشنل ایکشن پلان کے تحت دہشت گردوں کا مکمل صفایا ہونا چاہئے۔