صحت کارڈ پر خرچ 450 ارب، دنیا کو دکھائینگے فلاحی ریاست کیا ہے۔وزیراعظم

اسلام آباد: وزیر اعظم عمران خان نے کہا ہے کہ صحت کارڈ پر حکومت 450 ارب روپے خرچ کر رہی ہے، ہم دنیا کو دکھائیں گے کہ فلاحی ریاست کیا ہوتی ہے۔

تفصیلات کے مطابق اسلام آباد میں صحت کارڈ کے اجراء کی تقریب سے خطاب کرتے ہوئے وزیر اعظم نے کہا کہ وفاقی و صوبائی حکومتیں صحت کارڈ جیسا بڑا قدم اٹھانے کے قابل ہوئیں۔ ہر خاندان 10 لاکھ روپے تک علاج کرانے کا اہل ہوگا۔

یہ بھی پڑھیں:

جمائما سے عمران خان کے پاس جانے کی درخواست، بشریٰ بی بی کا کیا ہوگا؟

تقریب سے خطاب کے دوران وزیر اعظم نے کہا کہ صحت کارڈ کے ذریعے ہر شخص سرکاری ہسپتال کے ساتھ ساتھ نجی ہسپتال سے بھی علاج کروا سکے گا۔ مجھے برطانوی نظامِ صحت نے متاثر کیا جو دنیا میں سب سے اچھا سسٹم مانا جاتا ہے۔

خطاب کے دوران وزیر اعظم عمران خان نے کہا کہ میں برطانوی نظامِ صحت سے متاثر ہوا لیکن جو ہماری حکومت کرے گی، ایسا پروگرام شاید ہی دنیا میں کسی اور حکومت نے کیا ہو۔ ملک کا نظام اشرافیہ کیلئے کام کرتا تھا لیکن صحت کارڈ سب کیلئے ہے۔

وزیر اعظم عمران خان نے کہا کہ ماضی کے حکمران کھانسی کے علاج کیلئے بھی ملک سے باہر روانہ ہوجاتے تھے۔ میانوالی جیسے پسماندہ علاقے ک لوگ سرکاری ہسپتال میں علاج کیلئے راولپنڈی جاتے تھے۔ حکومت 5مدر اینڈ چائلڈ ہسپتال بنانے جارہی ہے۔

انہوں نے کہا کہ ہماری حکومت دنیا کیلئے رول ماڈل ہوگی کہ فلاحی ریاست کس چیز کا نام ہے۔ نجی ہسپتالوں کو سہولیات دی جارہی ہیں۔ انہیں سستی زمین بھی مہیا کی جارہی ہے۔ عثمان بزدار پر جتنی تنقید ہوئی، کسی اور صوبے کے وزیر اعلیٰ پر نہیں ہوئی۔