فارن فنڈنگ کیس، الیکشن کمیشن جانبداری کا مظاہرہ کر رہا ہے۔ پی ٹی آئی

 پاکستان تحریکِ انصاف نے فارن فنڈنگ کیس میں الیکشن کمیشن پر جانبداری کا الزام لگاتے ہوئے اسلام آباد ہائیکورٹ سے رجوع کر لیا ہے۔ پی ٹی آئی رہنماؤں کا کہنا ہے کہ الیکشن کمیشن کے ممبران فارن فنڈنگ کیس کی سماعت میں جانبداری سے کام لے رہے ہیں۔

تفصیلات کے مطابق تحریکِ انصاف کے وکلاء شاہ خاور اور انور منصور خان نے تحریکِ انصاف رہنما عامر کیانی کی جانب سے دائر کی گئی درخواست میں الیکشن کمیشن اور 17 سیاسی جماعتوں کو فریق بناتے ہوئے الزام عائد کیا ہے کہ الیکشن کمیشن ممبران نے فارن فنڈنگ کیس میں جانبداری کا مظاہرہ کیا ہے۔

یہ بھی پڑھیں:

عارف علوی صدر بنیں عمران خان کے ذاتی غلام نہیں، رانا ثناء اللہ

ہائیکورٹ میں دائر کی گئی درخواست میں پی ٹی آئی نے عدالت سے استدعا کی ہے کہ تحریکِ انصاف کے علاوہ دیگر سیاسی جماعتیں بھی فارن فنڈنگ کیس کا سامنا کر رہی ہیں۔ اگر پی ٹی آئی کا فیصلہ ایک ماہ میں کرنا ہے تو دیگر جماعتوں کے فنڈنگ کیسز کو بھی اسی طرح ایک ماہ میں نمٹا دیا جائے۔ تحریکِ انصاف کے خلاف کارروائی میں جانبداری برتنا قابلِ قبول نہیں۔

پی ٹی آئی رہنما کی جانب سے دائر کی گئی درخواست میں استدعا کی گئی ہے کہ الیکشن کمیشن آف پاکستان 17 دیگر سیاسی جماعتوں کے کیسز کو  بھی ایک ماہ میں فیصلہ کرکے نمٹائے۔ واضح رہے کہ الیکشن کمیشن کو فارن فنڈنگ کیس کا فیصلہ ایک ماہ میں کرنے کی ہدایت اسلام آباد ہائیکورٹ نے ہی جاری کی تھی جس کے بعد سے کیس کی کارروائی تیز کی گئی۔

الیکشن کمیشن آف پاکستان نے فارن فنڈنگ کیس کی سماعت روزانہ کی بنیاد پر شرو ع کر رکھی ہے جس پر پی ٹی آئی کو اعتراض ہے۔ تحریکِ انصاف کے رہنماؤں کا کہنا ہے کہ اگر پی ٹی آئی کے خلاف فارن فنڈنگ کیس کی سماعت روزانہ کی بنیاد پر ہوسکتی ہے تو دیگر سیاسی جماعتوں کے ساتھ بھی ایسا ہی سلوک کرنا چاہئے۔