گوگل نیوز پر ہمیں فالو کریںسال 2019ء کھیلوں کے حوالے سے پاکستان میں بہت سی خوشیاں لے کر آیا مگر قومی کھیل ہاکی کے حالات میں کوئی بہتری دیکھنے میں نہیں آئی ۔آئیے ہم آپ کو بتاتے ہیں کھیلوں کے میدان میں پاکستان کی مجموعی کارکردگی کیسی رہی۔
اس سال ہالینڈ میں ہونے والے اولمپک کوالیفائنگ راؤنڈ میں پاکستانی ہاکی ٹیم متاثر کارکردگی نہ دکھا سکی اور مسلسل دوسری بار بھی ایونٹ سے باہر ہوگئی۔
سال کے آغاز میں ہی پاکستان کی اہم کرکٹ سپر لیگ پی ایس ایل 4 کو پاکستانیوں نے خوب انجوائے کیاجس کا ٹائیٹل کوئٹہ گلیڈی ایٹرز نے اپنے نام کیا۔
دوسری جانب پاکستان نے کھٹمنڈو میں ہونے والی 13ویں ساؤتھ ایشین گیمز کا اختتام سینکڑوں تمغوں کے ساتھ کیا۔ جس میں متعدد سونے کے تمغے بھی شامل ہیں۔
کرکٹ کے حوالے سے اگر بات کی جائے تو 2019ء میں پاکستان کی ٹیسٹ ٹیم کی کارکردگی انتہائی ناقص رہی، پاکستانی ٹیم 4 ٹیسٹ سیریز میں 1 ہی جیت سکی، جبکہ ورلڈ کپ 2019 میں پاکستان کی کارکردگی بھی مناسب تھی اس کی وجہ پاکستان کا سیمی فائنل تک رسائی حاصل نہ کرنا تھا۔
اس طرح ٹینس اسٹار اعصام الحق نے بھارتی اثرورسوخ پر انٹرنیشنل ٹینس فیڈریشن کی طرف سے ڈیوس کپ مقابلے پاکستان سے باہر منتقل کرنے پر ایونٹ کا بائیکاٹ کردیا ۔
پاکستانی پہلوان انعام بٹ نے دوحا میں ورلڈ بیچ ریسلنگ میں گولڈ میڈل جیتا اور پاکستان کا نام روشن کیا۔
پاکستان کے محمد آصف نے ترکی کے شہر انطالیہ میں ہونے والی انٹرنیشنل بلیئرڈ اینڈ سنوکر فیڈریشن (آئی بی ایس ایف) ورلڈ سنوکر چیمپیئن شپ جیتی۔
اس سلسلے کو برقرار رکھتے ہوئے پاکستانی باکسر محمد وسیم نے دبئی میں منعقد ہونے والے ’ایم ٹی کے گلوبل` کے باکسنگ ایونٹ میں میکسیکو کے گنیگن لوپیز کو شکست دی۔اب انہوں نے اپنی نظریں 2020 میں فلائی ویٹ ٹائٹل پر جما لی ہیں۔
یہاں ہم آپ کو بتاتے چلیں کہ پاکستان کے صوبہ بلوچستان کے شہر کوئٹہ سے تعلق رکھنے والے محمد وسیم وہ پہلے پاکستانی باکسر ہیں جنھیں یہ اعزاز حاصل ہوا۔
اس طرح پاکستان نے اے سی سی ایمرجنگ ٹیمز ایشیا کپ کے فائنل میں بنگلہ دیش کو 77 رنز کے بڑے مارجن سے شکست دے کر ایمرجنگ ٹیمز ایشیا کپ کا فائنل جیت لیا۔
سری لنکن ٹیم نے ٹی ٹوئنٹی، ایک روزہ اور ٹیسٹ میچ کھیل کر پاکستان کے ویران میدانوں کو ایک بار پھر آباد کرنےمیں مدد کی تاہم ٹیسٹ کرکٹ میں سال 2019ء کے دوران قومی کرکٹ ٹیم صرف ایک ٹیسٹ میچ میں کامیابی حاصل کرسکی۔
اسی طرح سال 2019 ء میں شاہین شاہ آفریدی پاکستان کی جانب سے کامیاب ترین باؤلرثابت ہوئے اوربابر اعظم کا بلا مسلسل رنز اگلتا رہا۔
دوسری جانب ویمنز ٹیم کی سابق کپتان ثناء میر کوکرکٹ کے بائبل کہلائے جانے والے عالمی جریدے وزڈن نے نہ صرف اس دہائی کی ویمن ٹیم میں شامل کیا بلکہ انہیں اس ٹیم کا کپتان بھی مقرر کیا گیا ہے۔
