لیاقت باغ میں جلسہ کرانے پر نائب امیر جماعت اسلامی راولپنڈی کے خلاف 2مقدمات درج

راولپنڈی انتظامیہ نے ایس او پیز کی خلاف ورزی اور بلااجازت 28 مارچ کو لیاقت باغ میں جلسے کرانے پر نائب امیر جماعت اسلامی راولپنڈی کے خلاف 2 مقدمات درج کرا دیئے۔

ایم ایم نیوز سے خصوصی گفتگو کرتے ہوئے نائب امیر جماعت اسلامی راولپنڈی ظہیر احمد رضا نے بتایا کہ ہم نے 28 مارچ کو لیاقت باغ میں جلسے کی باقاعدہ اجازت لے رکھی تھی۔

ظہیر احمد رضا کا کہنا تھا کہ انہوں نے جماعت اسلامی کے کارکنان کے ساتھ لیاقت باغ کی سکیورٹی چیک کرنے کے لیے جلسہ گاہ کا دورہ کیا تو وہاں پر موجود حکومتی اہلکاروں نے انہیں گیٹ پر روک لیا اور تلخ کلامی شروع کر دی اور کہا کہ آپ لوگ کورونا وائرس کے ایس او پیز کی خلاف ورزی کر رہے ہیں ہم آپ لوگوں کو جلسہ نہیں کرنے دیں گے۔

نائب امیر جماعت اسلامی راولپنڈی نے بتایا کہ پولیس اور گیٹ پر موجود انتظامیہ کے اہلکاروں نے کہا کہ ہمارے پاس لیاقت باغ میں جلسہ کرانے کے کوئی احکامات نہیں آئے اس لیے ہم آپ کو جلسہ نہیں کرنے دیں گے۔

جماعت اسلامی کے رہنما کا کہنا تھا کہ یہ سراسر جھوٹ ہے کہ ہم نے پولیس اور راولپنڈی انتظامیہ کو زدوکوب کیا ہے، اور یہ غلط الزام ہے کہ ہم گیٹ پھلانگ کر پارک میں داخل ہوئے اور تالے توڑ دیئے۔

ان کا مزید کہنا تھا کہ حکومتی وزراء اور مشیر بھی جلسے جلوس کرتے ہیں تب انتظامیہ کو ایس او پیز اور اجازت نامے کا خیال نہیں آتا ۔ ظہیر احمد رضا کا کہنا تھا کہ ہم راولپنڈی انتظامیہ کے اس رویے کی شدید الفاظ میں مذمت کرتے ہیں اور مطالبہ کرتے ہیں کہ ہمارے اوپر بنائے گئے مقدمات کو فوری ختم کیاجائے۔