کراچی میں حادثات، 5افراد ہلاک، چاکیواڑہ سے لاش ملی، ایک شہری فائرنگ سے زخمی

کراچی: شہر قائد میں بارش کے بعد ٹریفک حادثات میں ایک خاتون سمیت 5 افراد ہلاک جبکہ ایک خاتون اور بچہ زخمی ہوگئے، چاکیواڑہ سے لاش ملی، سپرہائی وے جنجال گوٹھ کے قریب ایک شہری فائرنگ سے زخمی ہوگیا۔

بارش کے باعث ناظم آباد اے او کلینک کے قریب موٹرسائیکل سلپ ہونے سے 45سالہ انیلا زوجہ اسلم جاں بحق جبکہ اسکا شوہر50سالہ اسلم ولد نثار زخمی ہوگیا۔ میاں بیوی کو ایدھی ایمبولینس کے ذریعے عباسی شہید ہسپتال منتقل کیا گیا۔

ادھر گلشن معمار بنگالی موڑ کے قریب گھر میں کرنٹ لگنے سے 22سالہ نوجوان محمد عرفان ولد محمد حسین جاں بحق ہوگیا ،لاش کو ایدھی ایمبولینس کے ذریعے قریبی اسپتال سے ایدھی سہراب گوٹھ سرد خانے منتقل کیا گیا۔

مزید پڑھیں:اورنگی میں گھر کی چھت گر نے سے ماں اور 3بچے جاں بحق

ناردرن بائی پاس خیبر ہوٹل کے قریب ٹریفک حادثہ میں34سالہ نوجوان جاں بحق ہوگیا لاش کو چھیپا ایمبولینس کے ذریعے عباسی ہسپتال منتقل کیاگیا۔

کورنگی دارالعلوم کے قریب ٹریفک حادثے میں ایک خاتون و مرد جاں بحق اوربچہ زخمی ہوگیا،جاں بحق و زخمی ہونے والوں کی شناخت تاحال نہ ہوسکی۔

سپرہائی وے جنجال گوٹھ کے قریب فائرنگ سے ایک شخص زخمی ہوگیا جسے عباسی ہسپتال منتقل کیاگیاہے۔چھیپا ذرائع کے مطابق زخمی ہونے والے شخص کی شناخت غلام حسین ولد محمد ابراہیم کے نام سے ہوئی ہے۔

چاکیواڑہ کے علاقے بہار کالونی 10 نمبرمارکیٹ کے قریب سے 45سالہ شخص کی لاش ملی ہے، جسے سول اسپتال منتقل کردیاگیاتاہم فوری طور پر شناخت نہیں ہوسکی ہے۔