ویمن ورلڈ کپ، بنگلہ دیش نے پاکستان کو 9 رنز سے شکست دے دی

نیوزی لینڈ میں کھیلے گئے ویمن ورلڈ کپ کے ون ڈے میچ میں بنگلہ دیش نے پاکستان کو 9 رنز سے شکست دے دی ہے۔ قومی ٹیم نے جنوبی افریقہ کے خلاف شکست سے سبق نہ سیکھتے ہوئے ٹاس جیت کر بولنگ کا فیصلہ کیا تھا، جو غلط ثابت ہوا۔

تفصیلات کے مطابق ایک طرف بنگلہ دیش کی ٹیم میں سے سب سے زیادہ 71 رنز فرغانہ حق نے بنائے جبکہ پاکستان کو سدرہ امین کی 104 رنز کی شاندار اننگز بھی شکست سے بچانے میں کامیاب نہ ہوسکی۔ ٹیم کی مجموعی کارکردگی میں بنگلہ دیش جیت گیا۔

یہ بھی پڑھیں:

دوسرا ٹیسٹ،آسٹریلیا نے پہلی اننگز میں 8وکٹوں پر 505رنز بنا لئے

قومی ٹیم کی کپتان بسمہ معروف نے ٹاس جیت کر پہلے بولنگ کا فیصلہ کیا۔ بنگلہ دیش نے مقررہ 50 اوورز میں 7 وکٹوں کے نقصان پر 234 رنز بنا لیے۔ جواباً قومی ٹیم 50 اوورز میں 9 وکٹوں کے نقصان پر 225 رنز بنا سکی۔

جنوبی افریقہ کے خلاف کھیلتے ہوئے بھی قومی ٹیم 200رنز سے زائد کا ہدف عبور کرنے میں ناکام ہوگئی تھی۔ اس کے باوجود قومی ٹیم نے پہلے بولنگ کا فیصلہ کیا۔ بنگلہ دیش کی فرغانہ حق نے 71، نگار سلطانہ نے 46 جبکہ شرمین اختر نے 44رنز بنائے۔

دوسری جانب پاکستان کی سدرہ امین نے 104 رنزبنائے۔ ناہیدہ خان 43 جبکہ کپتان بسمہ معروف 31 رنز بنا کر نمایاں بیٹرز میں شامل ہوگئیں تاہم مڈل آرڈر اور ٹیل اینڈرز خاطر خواہ رنز بنانے میں کامیاب نہ ہوسکے۔

مخالف ٹیم بنگلہ دیش کی فہیمہ خاتون نے قومی ٹیم کی 3 اور رومانہ احمد نے 2 کھلاڑیوں کو آؤٹ کیا۔ جہاں آرا عالم اور سلمیٰ خاتون نے ایک ایک وکٹ لی۔قبل ازیں پاکستانی بولرز میں نشرہ سندھو 3، فاطمہ ثناء، ندا ڈار اور عمائمہ سہیل نے 1،1 وکٹ لی۔