اسلامو فوبیا، اقوام متحدہ میں پاکستان کی قرار داد منظور ہونے پر وزیر اعظم کی مسلم دنیا کو مبارکباد

اسلام آباد: وزیر اعظم عمران خان نے مسلم دنیا کو مبارکباد دی ہے کیونکہ اقوام متحدہ نے پاکستان کی طرف سے متعارف کرائی گئی ایک ”تاریخی قرارداد” منظور کرلی گئی ہے، جس کے مطابق 15 مارچ کو اسلامو فوبیا سے نمٹنے کا عالمی دن قرار دیا گیا ہے۔

ایک ٹویٹ میں وزیراعظم نے کہا کہ اقوام متحدہ نے بالاخر دنیا کو درپیش اسلام مخالف منفی پراپیگنڈے، مذہبی آثار ورسومات کی تعظیم، منظم نفرت انگیزی کے انسداد اور مسلمانوں کے خلاف تفریق جیسے بڑے چیلنجز کا اعتراف کیا اس تاریخ قرار داد کا نفاذ یقینی بنانا اب اگلا امتحان ہے۔

اقوام متحدہ کی جنرل اسمبلی کی جانب سے او آئی سی ممالک کی جانب سے پاکستان کی جانب سے متعارف کرائی گئی ”تاریخی” قرار داد کی منظوری کے بعد وزیراعظم نے کہا کہ ”اسلامو فوبیا کی بڑھتی ہوئی لہر کے خلاف ہماری آواز سنی گئی ہے۔”

قرارداد کو OIC کے 57 ممبران اور چین اور روس سمیت آٹھ دیگر ممالک نے اسپانسر کیا۔ اس کی شرائط کے تحت، قرارداد افراد کے خلاف ان کے مذہب یا عقیدے کی بنیاد پر تشدد کی تمام کارروائیوں اور ان کی عبادت گاہوں کے خلاف ہونے والی ایسی کارروائیوں کے ساتھ ساتھ مذہبی مقامات، اور مزارات پر اور ان پر ہونے والے تمام حملوں کی سختی سے مذمت کرتی ہے جو بین الاقوامی قانون کی خلاف ورزی کے زمرے میں آتے ہیں۔

وزیراعظم مختلف فورمز پر اپنے خطابات میں اور مسلم دنیا کو خطوط کے ذریعے بڑھتے ہوئے اسلامو فوبیا کے خلاف باقاعدگی سے بات کرتے رہے ہیں۔

اقوام متحدہ کی جنرل اسمبلی سمیت عالمی پلیٹ فارمز پر، وزیر اعظم عمران خان دنیا سے اسلام فوبیا کے خلاف کارروائی کرنے کا مطالبہ کر تے رہے ہیں اور عالمی رہنماؤں سے ”غیر مسلم ریاستوں میں بڑھتے ہوئے تشدد کے رجحان کا مقابلہ کرنے کے لیے اجتماعی طور پر کام کرنے” کا مطالبہ کرتے رہے ہیں۔

مزید پڑھیں: عدم اعتماد ناکام ہوگی، ان کا 2023 کا الیکشن بھی گیا، وزیر اعظم عمران خان

وزیر اعظم عمران خان نے حال ہی میں روسی صدر ولادیمیر پیوٹن کے بیان کو بھی سراہا جس میں کہا گیا تھا کہ آزادی اظہار رسول اللہ صلی اللہ وآلہ علیہ وسلم کو برا کہنے کا بہانہ نہیں ہو سکتا۔