کراچی سے لاپتہ ہونے والی دعا زہرا پنجاب سے شوہر سمیت بازیاب

لاہور: کراچی سے لاپتہ ہونے والی کمسن دُعا زہرا کو پنجاب سے شوہر سمیت بازیاب کرا لیا گیا ہے، سہولت کار کو گرفتار کر لیا گیا۔ پولیس کو لاپتہ لڑکی کی بازیابی میں 1 ماہ 21 روز لگ گئے۔

تفصیلات کے مطابق پنجاب اور سندھ سمیت 2 صوبوں کی پولیس نے دعا زہرا کی بازیابی کیلئے اپنا کردار ادا کیا۔ دعا زہرا کو بہاولنگر کی تحصیل چشتیاں سے بازیاب کیا گیا ہے۔

یہ بھی پڑھیں:

دعا زہرا کیس، سندھ ہائیکورٹ کا ملزمان کے شناختی کارڈ بلاک کرنیکا حکم

حکام کا کہنا ہے کہ دعا زہرا اور شوہر ظہیر قانونی تقاضے پورے ہونے کے بعد کراچی پہنچیں گے۔ ایس ایس پی اے وی سی سی زبیر نذیر شیخ کا کہنا ہے کہ میاں بیوی پولیس کی حفاظتی تحیل میں ہیں۔

پولیس کا مزید کہنا ہے کہ سی آئی اے نے ایک وکیل کے گھر سے دعا زہرا اور شوہر کو برآمد کیا۔ دونوں کو کراچی پولیس کی تحویل میں دے دیا گیا ہے۔ ظہیر کیے اہلِ خانہ پہلے ہی گرفتار ہیں۔

کراچی پولیس کے ریکارڈ کے مطابق لڑکی کے اغوا کا کیس 16 اپریل کو رپورٹ کیا گیا تاہم دعا زہرا کی جانب سے ظہیر سے شادی کا اعتراف کیس کی تفتیش کیلئے بڑا محرک بن گیا۔

سندھ ہائیکورٹ کو دی گئی درخواست میں دعا زہرا کے والد نے مؤقف اپنایا کہ میری بیٹی ابھی 14سال کی ہے، قانون کے تحت وہ شادی نہیں کرسکتی۔ عدالت بچی کی بازیابی کے بعد اسے ہمارے حوالے کرے۔

سانگھڑ میں بھی دعا زہرا کی گرفتاری کیلئے چھاپہ مارا گیا تاہم سندھ ہائیکورٹ نے دعا زہرا کا بیان سامنے آجانے کے بعد بھی دونوں میاں بیوی کو 1 ہفتے میں پیش کرنے کا حکم جاری کیا تھا۔