مقبوضہ وادی پر بھارت کا ظلم جاری، مزید 4 کشمیری نوجوان شہید

سری نگر: مقبوضہ جموں و کشمیر پر بھارت کا جبر اور ظلم و ستم جاری ہے، بھارتی فوجیوں نے ریاستی دہشت گردی کی تازہ کارروائیوں کے دوران 4 کشمیری نوجوانوں کو شہید کردیا۔

تفصیلات کے مطابق بھارتی فوج نے مقبوضہ جموں و کشمیر کے 2 مختلف علاقوں میں نام نہاد محاصرے اور سرچ آپریشن کے دوران 4 کشمیری نوجوانوں  کو شہید کردیا جن کا تعلق لولاب اور ڈی ایچ پورہ سے تھا۔

یہ بھی پڑھیں:

بھارت اور بنگلا دیش میں بارشوں نے تباہی مچادی، 50 افراد ہلاک

سب سے پہلے بھارتی فوج نے ضلع کپواڑہ کے علاقے لولاب میں نام نہاد محاصرے کے دوران 2 کشمیری نوجوانوں کو جبکہ ایک اور کارروائی میں ضلع کولگام کے علاقے  ڈی ایچ پورہ میں مزید 2 نوجوانوں کو شہید کردیا۔

کشمیر میڈیا سروس کا کہنا ہے کہ گزشتہ 33 سال میں بھارت کی مسلسل ریاستی دہشت گردی اور بے پناہ ظلم و جبر کے باعث 1 لاکھ 7 ہزار 860بچے یتیم اور 22 ہزار 944 خواتین بیوہ ہوگئیں۔

مقبوضہ وادی میں 2010 سے پر امن مظاہرین پر بھارتی فوجیوں اور نیم فوجی دستوں کی جانب سے پیلٹ فائرنگ کے باعث سیکڑوں نوجوانوں کی آنکھوں کی بینائی کو نقصان پہنچا یا پھر وہ بصارت سے محروم ہو گئے۔

کے ایم ایس کے مطابق ہزاروں کشمیری بالخصوص بچے بھارتی فورسز کے مسلسل محاصرے اور تلاشی سمیت ریاستی دہشت گردی کا شکار ہو کر اپنے والدین سے محروم ہوگئے اور نفسیاتی مسائل کا سامنا کرنے پر مجبور ہیں۔