راولپنڈی، کنویں میں زہریلی گیس بھرجانے کے باعث 5افراد جاں بحق

راولپنڈی: کنویں میں زہریلی گیس بھر جانے کے باعث دم گھٹنے سے 5 افراد جاں بحق ہو گئے جن میں سے 4 بے ہوش ہونے والے ایک شخص کو بچانے کیلئے کنویں میں اترے تھے۔

تفصیلات کے مطابق یہ افسوسناک واقعہ راولپنڈی کے علاقے روات میں پیش آیا۔ روات کے ٹھٹہ گاؤں میں ایک شخص کنویں میں صفائی کیلئے اترا تاہم زہریلی گیس بھر جانے کے باعث بے ہوش ہوگیا۔

یہ بھی پڑھیں:

کوئلے کی کان میں زہریلی گیس بھرنے سے 4 کان کن جاں بحق

بے ہوش ہونے والے شخص کو نکالنے کیلئے 7 مزید افراد کنویں میں اتر گئے جس کے بعد تمام افراد زہریلی گیس کے باعث بے ہوش ہو گئے۔ واقعے کی اطلاع ملنے کے بعد پولیس اور ریسکیو ٹیم جائے حادثہ پر پہنچی۔

امدادی کارروائیوں کے دوران ریسکیو اہلکاروں نے تمام بے ہوش افراد کو باہر نکال لیا تاہم اس وقت تک دم گھٹنے کے باعث 5 افراد جاں بحق ہوئے تاہم 3 خوش قسمتی سے زندہ بچ گئے۔ تمام متاثرہ افراد کو ہسپتال منتقل کردیا گیا ہے۔

حکام کا کہنا ہے کہ زہریلی گیس سے متاثرہ زندہ بچ جانے والے افراد کی حالت انتہائی تشویشناک ہے۔ روات پولیس نے واقعے پر تفتیش شروع کردی۔ قبل ازیں بلوچستان میں بھی ایسے ہی ایک واقعے میں 4 افراد جاں بحق ہوگئے تھے۔ 

یاد رہے کہ اس سے قبل بلوچستان کے ضلع دکی کے علاقے چمالنگ میں انگور شیلہ کے مقام پر کوئلے کی کان میں زہریلی گیس بھرنے کے باعث دم گھٹنے سے 4 کان کن جاں بحق ہو گئے۔

گزشتہ برس ستمبر میں پیش آنے والے افسوسناک واقعے میں جاں بحق ہونے والے کان کنوں کی لاشیں نکال کر اسپتال منتقل کردی گئیں۔ چیف مائنز انسپکٹر نے بتایا کہ جاں بحق کان کنوں کا تعلق بلوچستان کے علاقے ژوب سے تھا۔