ملک بھر میں بجلی کا شارٹ فال 9000میگاواٹ کے لگ بھگ، لوڈ شیڈنگ طویل

اسلام آباد: ملک بھر میں بجلی کا شارٹ فال 9000 میگا واٹ کے لگ بھگ ہے جبکہ مختلف شہروں میں وقفے وقفے سے گھنٹوں طویل لوڈ شیڈنگ عوام کیلئے وبالِ جان بن گئی۔

تفصیلات کے مطابق بجلی کا بحران سنگین رخ اختیار کر گیا، پاور ڈویژن کا کہنا ہے کہ ملک بھر میں شدید گرمی کے باعث بجلی کی طلب ریکارڈ حد تک بڑھ گئی ہے۔ بجلی کا شارٹ فال 8 ہزار 911 میگا واٹ تک جا پہنچا۔

یہ بھی پڑھیں:

جاپان، پاکستان کو 23 لاکھ امریکی ڈالر کی امداد فراہم کرے گا

دوسری جانب ملک بھر میں بجلی کی طلب کا تخمینہ 30 ہزار 233 میگا واٹ جبکہ کل پیداوار کا تخمینہ 21 ہزار 322 میگاواٹ لگایا گیا ہے۔ سندھ، پنجاب، خیبر پختونخوا اور بلوچستان میں بھی لوڈ شیڈنگ جاری ہے۔

شہری علاقوں میں 12 سے 14 جبکہ دیہی علاقوں مں 16 سے 18 گھنٹوں تک طویل لوڈ شیڈنگ کی جارہی ہے۔ لائن لاسز کی مد میں 2000 میگا واٹ سے زائد بجلی ضائع ہونے کا خدشہ ہے۔

کے الیکٹرک اور لیسکو سمیت بجلی کی تقسیم کار کمپنیاں تکنیکی خرابی کا بہانہ بنا کر لوڈ شیڈنگ میں اضافہ جاری رکھے ہوئے ہیں۔ پاور ڈویژن کا کہنا ہے کہ ٹرپنگ اور اوور لوڈنگ کے باعث لوڈ شیڈنگ میں اضافہ ہوا۔

گزشتہ روز کراچی کے شہریوں نے کے الیکٹرک کی جانب سے اعلانیہ و غیر اعلانیہ لوڈ شیڈنگ کے خلاف احتجاج کرتے ہوئے مختلف مقامات پر سڑک بلاک کردی۔ احتجاج پر موجود مظاہرین میں سے ایک خاتون جاں بحق بھی ہوگئی تھیں۔