شاہین کی انجری کھیل کا حصہ،پاکستان نے ایشیاء کپ کیلئے بھرپور محنت کی۔ثقلین مشتاق

لاہور: قومی کرکٹ ٹیم کے ہیڈ کوچ ثقلین مشتاق نے کہا ہے کہ پاکستان نے ایشیاء کپ کیلئے بھرپور محنت کی ہے، ہمارے کھلاڑیوں کو سردی گرمی سے کوئی فرق نہیں پڑتا جبکہ شاہین آفریدی کی انجری کھیل کا حصہ تھی۔

تفصیلات کے مطابق یو اے ای میں 28 اگست سے شروع ہونے والے ایشیاء کپ کے متعلق میڈیا سے گفتگو کرتے ہوئے ثقلین مشتاق نے کہا کہ پاکستان کے فاسٹ بولر کافی وقت سے بہترین کھیل کا مظاہرہ کر رہے ہیں، شاہین آفریدی زخمی ہوگئے پھر بھی ہمارا فاسٹ بولنگ کا شعبہ شاندار ہے۔

یہ بھی پڑھیں:

ویراٹ کوہلی کی شاہین آفریدی سے ملاقات، خیریت دریافت کی

میڈیا سے گفتگو کے دوران ثقلین مشتاق نے کہا کہ ہمارے کھلاڑیوں کو خود کو ماحول کے مطابق ڈھالنا آتا ہے۔ شاہین کا زخمی ہوجانا کھیل کا حصہ تھا تاہم دیگر فاسٹ بولرز بھی کافی عرصے سے اچھی پرفارمنس دے رہے ہیں۔ پاکستان کے پاس حارث رؤوف، حسنین اور نسیم جیسے بولرز موجود ہیں۔

انہوں نے کہا کہ مجھے پاکستان کے بولنگ اٹیک پر پورا بھروسہ ہے کہ ہم میچز جیت سکتے ہیں۔ پاک بھارت میچ کو عام کھیل کی طرح لیں گے۔ دونوں ممالک کے لوگ کرکٹ سے محبت رکھتے ہیں۔ ہر ملک کے لوگوں کو حق ہے کہ اپنی اپنی ٹیم کو سپورٹ کریں۔ ایشیاء کپ میں بہترین پرفارمنس دینے کی کوشش ہوگی۔