کراچی میں بڑے پیمانے پر جعلی لائسنس پر اسلحے کی خریدوفروخت، پولیس حرکت میں آگئی

کراچی پولیس شہر میں بڑے پیمانے پر جعلی لائسنس پر اسلحے کی خریدوفروخت پر حرکت میں آگئی ہے۔ تحقیقات کیلئے کمیٹی تشکیل دے دی گئی۔

تفصیلات کےمطابق کراچی میں بڑے پیمانے پر جعلی اسلحہ لائسنسز اور ان پر اسلحے کی خریدو فروخت کا انکشاف سامنے آگیا۔ ایڈیشنل آئی جی نے تحقیقات کیلئے کمیٹی قائم کردی ہے۔ باضابطہ نوٹیفکیشن جاری کردیا گیا۔

یہ بھی پڑھیں: 

پولیس مقابلوں میں1 ڈاکو ہلاک، 10 موبائل فون، 6موٹر سائیکل برآمد

پولیس کی تحقیقاتی ٹیم میں ایس پی بلدیہ کیپٹن فیضان اور ایس پی انوسٹی گیشن کیماڑی شامل ہیں۔ کمیٹی جعلی لائسنسز بنانے اور ان پر اسلحہ فروخت کرنے والے ڈیلرز کی کھوج لگائے گی۔ لائسنسز کے ریکارڈ کا جائزہ لیا جائے گا۔

تحقیقاتی ٹیم سال 2012 سے لے کر 2020 تک جاری کیے جانے والے اسلحہ لائسنز کو چیک کر رہی ہے۔ پولیس کا کہنا ہے کہ ہزاروں کی تعداد میں نہ صرف جعلی لائسنسز بنائے گئے بلکہ اسلحہ بھی فروخت کیا گیا ہے۔

حکام کا کہنا ہے کہ لائسنس ہولڈرز کو بلا کر جعلی لائسنس اور اسلحہ ضبط کرنے کی کارروائی شروع کردی گئی ہے۔ کورنگی ساؤتھ، ایسٹ اور ویسٹ کے لائسنسز کے حوالے سے شکایات موصول ہوئی تھیں۔ 

خیال رہے کہ اس سے قبل کراچی میں ڈاکوؤں سے پولیس کے 10 مقابلے ہوئے، فائرنگ کے تبادلے میں 01 ڈاکو ہلاک جبکہ 11 زخمی ڈاکوؤں سمیت 16 ڈاکوؤں کو گرفتارکیا گیا ہے۔ملزمان کے قبضے سے 10 موبائل فون اور 6 موٹر سائیکل برآمد ہوئے۔ 

 شہرِ قائد میں رواں ماہ گرفتار کیے گئے 16 ملزمان سے 18 غیر قانونی اسلحہ، 10 موبائل فونز اور 06 موٹر سائیکلز برآمد کی گئیں جبکہ برآمدہ اسلحے کو فارنزک کیلئے روانہ کر دیا گیا۔ گرفتار ملزمان سے تفتیش شروع کردی گئی۔