گوگل نیوز پر ہمیں فالو کریںلاہور :وفاقی وزیر اطلاعات و نشریات عطاء اللہ تارڑ نے کہا ہے کہ ملک میں جمہوری عمل کے تسلسل میں سیاسی جماعتوں کے کارکنوں کا اہم کردار ہے، وزیراعظم نے تمام وزارتوں کو جوابدہ بنانے کا فیصلہ کرلیا ہے۔
پاکستان مسلم لیگ (ن) کے مرحوم کارکن عتیق چوہدری کی رہائش گاہ پر میڈیا سے گفتگو کرتے ہوئے عطاء اللہ تارڑ نے کہا کہ مسلم لیگ (ن) نے ہمیشہ خدمت کی سیاست کی ہے اور ہمیشہ اپنے کارکنوں کی آواز رہی ہے۔
سیاسی کارکن ہمارا اثاثہ ہیں، عتیق چوہدری جیسے کارکنوں کی وجہ سے ہم نے کامیابیاں حاصل کی ہیں، عدالتیں ہوں، یا تھانےعتیق چوہدری ہر جگہ پارٹی کے ساتھ کھڑے رہے۔
عتیق چوہدری کی خدمات کو سراہتے ہوئے انہوں نے کہا کہ مرحوم پارٹی کے بے لوث کارکن تھے جو مشکل سے مشکل وقت میں بھی پارٹی کے ساتھ کھڑے رہے۔ انہوں نے کہا کہ مخلص کارکن کبھی بھی اصولوں پر سمجھوتہ نہیں کرتے اور معمولی فائدے کے لیے کبھی اپنی وفاداریاں نہیں بیچتے۔
وزیر اطلاعات نے کہا کہ مشکل وقت میں ساتھ دینے والوں کے چہرے ہمیشہ یاد رہتے ہیں۔
ایک سوال کے جواب میں انہوں نے کہا کہ ن لیگ کی سابقہ حکومتوں میں ملک کے معاشی حالات بہت بہتر تھے۔
پی ٹی آئی کے بانی کے چار سالہ دور میں معاشی بدحالی ہوئی اس لیے گزشتہ 16 ماہ کے پی ڈی ایم کے دور میں معاشی بحالی پر زیادہ توجہ دی گئی۔
انہوں نے کہا کہ آج وفاقی کابینہ کا اہم اجلاس ہو رہا ہے۔ چند روز قبل وزیراعظم نے تمام وزارتوں کو تحریری شکل میں اہداف دیے تھے جن میں مختصر مدت اور طویل مدتی اہداف شامل تھے۔وزیراعظم نے اب تمام وزارتوں کا احتساب کرنے کا فیصلہ کیا ہے۔
پاکستان کی تاریخ میں پہلی بار وزارتوں کو تحریری دستاویزات میں اہداف تفویض کیے گئے ہیں۔ ان اہداف میں بے روزگاری کا خاتمہ، مہنگائی میں کمی اور عوام کے معاشی مسائل کا حل شامل تھا۔
انہوں نے کہا کہ وزیر اعظم شہباز شریف آج وفاقی کابینہ کے اجلاس میں اس پر بات کریں گے۔ انہوں نے کہا کہ تمام وزارتیں کابینہ کے اجلاس میں اپنی کارکردگی کے لیے جوابدہ ہوں گی۔
