گوگل نیوز پر ہمیں فالو کریںاسلام آباد :سپریم کورٹ نے سنی اتحاد کونسل کی مخصوص نشستوں کی الاٹمنٹ سے متعلق کیس کی سماعت کے لیے لارجر بینچ تشکیل دے دیا ہے۔
چیف جسٹس آف پاکستان قاضی فائز عیسیٰ کی سربراہی میں 13 رکنی بینچ 3 جون کو کیس کی سماعت کرے گا۔علیل جسٹس مسرت ہلالی کے علاوہ سپریم کورٹ کے دیگر تمام ججز بنچ کا حصہ ہوں گے۔
مئی کے شروع میں سپریم کورٹ نے الیکشن کمیشن آف پاکستان کے سنی اتحاد کونسل کی مخصوص نشستیں دیگر جماعتوں کو مختص کرنے کے فیصلے کو معطل کر دیا تھا۔
جسٹس منصور علی شاہ نے سماعت کے دوران ریمارکس دیے تھے کہ عوام نے جو مینڈیٹ دیا ہے اس کی پارلیمنٹ میں صحیح نمائندگی ہونی چاہیے۔
عدالت نے مخصوص نشستوں کا معاملہ ججز کمیٹی کو بھیج دیا تھا تاکہ یہ فیصلہ کیا جا سکے کہ اس کیس کی سماعت وہی بینچ کرے گا یا بڑا بینچ تشکیل دیا جائے گا۔
4 مارچ کو الیکشن کمیشن آف پاکستان نے مخالف جماعتوں کی درخواستیں قبول کرتے ہوئے فیصلہ کیا تھا کہ قومی اسمبلی اور صوبائی اسمبلیوں کی نشستیں خالی نہیں رہیں گی اور سیاسی جماعتوں کی جیتی ہوئی نشستوں کی بنیاد پر متناسب نمائندگی کے عمل کے ذریعے الاٹ کی جائے گی۔.
اس پیشرفت کے نتیجے میں پی ٹی آئی کی حمایت یافتہ ایس آئی سی کو کل 77 مخصوص نشستوں سے محروم ہونا پڑا – قومی اسمبلی کی 23 نشستیں (20 خواتین اور 3 اقلیتیں)، 25 خیبر پختونخوا اسمبلی کی نشستیں (21 خواتین اور 4 اقلیتیں)، سندھ اسمبلی کی دو نشستیں (خواتین) اور 27۔ پنجاب اسمبلی کی نشستیں (24 خواتین اور 3 اقلیتی) نشستیں دیگر جماعتوں کو دیدی گئی تھیں۔
پشاور ہائی کورٹ نے سنی اتحاد کونسل کی جانب سے خواتین اور اقلیتوں کی مخصوص نشستوں کے لیے دائر درخواستوں کو بھی مسترد کر دیا تھا۔ پارٹی نے الیکشن کمیشن آف پاکستان کی جانب سے خواتین اور اقلیتوں کی مخصوص نشستیں ایس آئی سی کو الاٹ نہ کرنے کے فیصلے کو چیلنج کیا تھا۔
