گوگل نیوز پر ہمیں فالو کریںنواب شاہ میں صنفی بنیاد پر تشدد کے ایک المناک واقعے میںدو لڑکیوں کو ان کے بھائی نے غیرت کے نام پر کرنٹ لگاکر ہلاک کر دیا۔
ملزم کی والدہ نے میڈیا کو بتایا کہ اس کے بیٹے نے مبینہ طور پر اپنی بہنوں کے مشروبات میں نشہ آور چیز ڈالی تاکہ وہ بے ہوش ہوجائیں۔
ماں اور بھابھی کی مداخلت کے باوجود ملزم باز نہ آیا اور دو خواتین کو قتل کر دیا۔ملزم نے مزاحمت پر ماں اور بہنوئی کو قتل کرنے کی دھمکی بھی دی۔
جاں بحق ہونے والی خواتین کی لاشوں کو پوسٹ مارٹم کے لیے پیپلز میڈیکل اسپتال منتقل کر دیا گیا۔
مقامی پولیس نے فوری طور پر ملزم کو گرفتار کر لیا اور اس کے خلاف مقدمہ درج کر لیا ہے۔
واضح رہے کہ ہاری ویلفیئر ایسوسی ایشن نے 2024 کے پہلے چھ ماہ کے دوران سندھ میں خواتین کے خلاف 837 جرائم کی اطلاع دی۔
اعداد و شمار کے مطابق جون 2024 تک 174 خواتین نے خودکشی کی، 118 کو قتل کیا گیا، اور 63 کو غیرت کے نام پر موت کے گھاٹ اتارا گیا۔
رپورٹ میں 140 اغوا، 125 عصمت دری اور گھریلو تشدد کے 68 واقعات، 13 جبری شادیاں، چھ بچوں کی شادیاں اور خواتین کے خلاف تیزاب کے تین خوفناک حملوں کی بھی دستاویز کی گئی ہے۔ان میں سے زیادہ تر واقعات لاڑکانہ اور سکھر ڈویژن میں رپورٹ ہوئے۔
