گوگل نیوز پر ہمیں فالو کریںکراچی :پولیس نے کراچی ایئرپورٹ خودکش حملے میں ملوث خودکش حملہ آور کے سہولت کار کو گرفتار کر لیا ہے جس میں دو چینی انجینئرز سمیت تین افراد ہلاک ہوئے تھے۔
پولیس ذرائع کا کہنا ہے کہ تفتیشی ٹیم نے ملیر میں چھاپے کے دوران خودکش بمبار شاہ فہد کے قریبی رشتہ دار کو حراست میں لے لیا ہے۔ پولیس نے دعویٰ کیا ہے کہ ملزم خودکش حملہ آور کا مبینہ سہولت کار ہے۔
ذرائع کا کہنا ہے کہ خودکش حملہ آور شاہ فہد حملے سے قبل مبینہ سہولت کار کے گھر میں ٹھہرا تھا۔ تفتیش کے دوران پولیس نے خودکش حملہ آور کے بیک اپ کے طور پر استعمال ہونے والی ایک اور گاڑی کا بھی پتہ لگایا ہے۔ اس گاڑی سے لی گئی ایک ویڈیو بھی ملی ہے۔
ذرائع نے مزید بتایا کہ گرفتار شخص نے خودکش حملہ آور سے کراچی کے علاقے صدر میں واقع ہوٹل میں ملاقات کی تھی۔
واضح رہے کہ ایئرپورٹ دھماکے کے بعد پولیس کی طرف سے تحقیقات کے ساتھ ساتھ خودکش بمبار کے سہولت کاروں کی گرفتاریوں کا سلسلہ بھی جاری ہے اور اب تک متعدد افراد کو حراست میں لیا جاچکا ہے۔
