چیئرمین نیب نے مزار قائد کے اطراف چائنا کٹنگ کا نوٹس لے لیا

کراچی: قومی احتساب بیورو (نیب) کےچیئرمین نے مزار قائد کے اطراف چائنہ کٹنگ کا نوٹس لے لیا۔ جسٹس (ر) جاوید اقبال نے ڈی جی نیب کراچی کو تحقیقات کا حکم دے دیا۔

نیب اعلامیے کے مطابق مزار قائد کے سامنے سندھ بلڈنگ کنٹرول اتھارٹی (ایس بی سی اے) کے بلڈنگ بائی لاز کی مبینہ طور پر خلاف ورزی کرتے ہوئے غیر قانونی تعمیرات کی گئی جس کی تحقیقات کا حکم ڈائریکٹر جنرل نیب کراچی نجف مرزا کو دیا ہے۔

نیب کاکہناہے کہ تحقیقات میں مزار قائد مینجمنٹ سوسائٹی کا کردار بھی دیکھا جائے گا، مزار قائد مینجمنٹ سوسائٹی نے سندھ بلڈنگ کنٹرول اتھارٹی کو آگاہ نہیں کیا،ایس بی سی اے کے متعلقہ افسران کی جانب سے کیا کارروائی کی گئی دیکھا جائے گا۔

یہ بھی پڑھیں: وفاقی کابینہ نے نیب ترمیمی آرڈیننس 2019 کی منظوری دے دی

نیب اعلامیےمیں مزیدکہناتھا کہ اس بات کی تحقیقات بھی کی جائیں گی کہ سندھ بلڈنگ کنٹرول اتھارٹی نے مزار قائد کے سامنے اوراطراف میں مبینہ طور پر چائنا کٹنگ اور غیر قانونی تعمیرات کرنے والوں کے خلاف ادارے کے قانون کے مطابق کیا کارروائی کی؟

اس کے علاوہ اس کی بھی تحقیقات ہوں گی کہ سندھ بلڈنگ کنٹرول اتھارٹی( ایس بی سی اے)کی جانب سے ذمہ دار افسران یا اہلکاروں کا تعین کرکے کیا محکمہ کارروائی عمل میں لائی گئی؟۔