گوگل نیوز پر ہمیں فالو کریںعالمی بینک گروپ کے ذیلی ادارے انٹرنیشنل فنانس کارپوریشن نے پاکستانی بینکر آمنہ عارف کو فلپائن کے لیے نیا کنٹری منیجر مقرر کر دیا ہے۔
قومی میڈیا کے مطابق آئی ایف سی میں اس عہدے پر فائز ہونے کے بعد آمنہ عارف نجی شعبے کی سرمایہ کاری کو متحرک کرنے، روزگار کے مواقع پیدا کرنے، ماحولیاتی تبدیلی کے اثرات کو کم کرنے اور مالیاتی شمولیت کو فروغ دینے پر توجہ دیں گی۔
آمنہ عارف کو بینکاری اور مالیاتی خدمات کے شعبے میں وسیع تجربہ حاصل ہے۔ وہ اس سے قبل جنوبی ایشیا اور مشرقی افریقہ میں کلیدی عہدوں پر خدمات انجام دے چکی ہیں۔
انہوں نے 2012 میں آئی ایف سی میں شمولیت اختیار کی، اس سے قبل وہ بین الاقوامی کمرشل بینکنگ کے شعبے میں نمایاں کردار ادا کر چکی ہیں، جہاں انہوں نے پاکستان، افغانستان اور لبنان میں قرض اور ایکوئٹی سرمایہ کاری کے منصوبوں کی قیادت کی۔
اپنی نئی تقرری سے قبل وہ نیروبی میں مشرقی افریقہ کے لیے آئی ایف سی کی کنٹری منیجر کے طور پر کام کر رہی تھیں اور اس سے پہلے سری لنکا اور مالدیپ میں بھی اسی عہدے پر فائز رہ چکی ہیں۔
آمنہ عارف نے اپنی تقرری پر خوشی کا اظہار کرتے ہوئے کہا، “مجھے ایشیا واپس آ کر خوشی محسوس ہو رہی ہے اور میں اپنے عوامی و نجی شعبے کے شراکت داروں کے ساتھ مل کر پائیدار اور جامع ترقی کے لیے کام کرنے کی منتظر ہوں۔
آئی ایف سی فلپائن میں سرمایہ کاری کے نئے مواقع پیدا کرنے، کاروباری اداروں کو ماحولیاتی تبدیلی کے اثرات سے نمٹنے میں مدد دینے، چھوٹے کاروباروں کی ترقی کو فروغ دینے اور ڈیجیٹل خدمات کو سب کے لیے قابلِ رسائی بنانے کے لیے پرعزم ہے۔”
آمنہ عارف نے پاکستان کی لاہور یونیورسٹی آف مینجمنٹ سائنسز (لمز) سے ایم بی اے کیا ہے۔ وہ جین مارک آربوگاسٹ کی جگہ سنبھال رہی ہیں جو اب عالمی بینک گروپ کے چلی میں کنٹری منیجر کے طور پر خدمات انجام دیں گے۔
آئی ایف سی ابھرتی ہوئی معیشتوں میں نجی شعبے کی ترقی پر توجہ دینے والا دنیا کا سب سے بڑا ادارہ ہے۔ یہ 100 سے زائد ممالک میں کام کرتا ہے اور سرمایہ، مہارت اور اثر و رسوخ کے ذریعے ترقی پذیر معیشتوں میں نئے مواقع پیدا کرنے میں مدد دیتا ہے۔
مالی سال 2024 میں آئی ایف سی نے نجی کمپنیوں اور مالیاتی اداروں کے لیے ریکارڈ 56 ارب ڈالر کی سرمایہ کاری کا اعلان کیا جس کا مقصد غربت کا خاتمہ اور پائیدار ترقی کو فروغ دینا ہے۔
