گوگل نیوز پر ہمیں فالو کریںنیٹ فلکس کی ڈرامہ سیریز ایڈولی سینس دنیا بھر میں ناظرین کی جانب سے بے حد مثبت ردعمل حاصل کر رہی ہے۔
مشہور فلم سازوں ہنسل مہتا اور شیکھر کپور نے بھی اس چار قسطوں پر مشتمل سیریز کی تعریف کی ہے جس میں معروف اداکار اسٹیفن گراہم نے مرکزی کردار ادا کیا ہے۔
بھارتی میڈیا کے مطابق اہم شخصیت جنہوں نے ایڈولی سینس کی تعریف کی ہے، وہ اداکارہ سارہ علی خان ہیں۔ انہوں نے اس سیریز کو انتہائی متاثر کن قرار دیا اور کہا کہ یہ ان کے لیے ایک دل دہلا دینے والا تجربہ تھا۔
این ڈی ٹی وی کو دیے گئے ایک انٹرویو میں سارہ علی خان نے ان کہانیوں کے بارے میں بات کی جن کا وہ حصہ بننا چاہتی ہیں۔
ایڈولی سینس کے حوالے سے ان کا کہنا تھا: “میں نے یہ سیریز دیکھی اور یہ واقعی دل کو جھنجھوڑ دینے والی ہے۔
آج کے دور میں اعلیٰ معیار کی تکنیکی مہارت کے ساتھ مضبوط کہانیاں ہی کامیاب ہو رہی ہیں۔ تیسری قسط میں ایک 13 سالہ بچہ مرکزی توجہ بن جاتا ہے، اور اس موقع پر عمر کی کوئی قید محسوس نہیں ہوتی۔ میرے لیے اس قسم کا کام بہت متاثر کن ہے۔”
انہوں نے مزید کہا: “ایسا انداز جو بالکل قدرتی اور حقیقت پسند ہو، مجھے بہت پسند آتا ہے۔ آج کے دور میں ناظرین کو اصلیت اور سچائی کی تلاش ہے، وہ بار بار دیکھی جانے والی کہانیوں میں دلچسپی نہیں رکھتے۔
میں ایسی کہانیاں دیکھنا چاہتی ہوں جو جڑیں مضبوط رکھتی ہوں اور دل پر اثر چھوڑنے والی ہوں۔
سارہ علی خان نے اپنے ملک بھارت کی ثقافت اور کہانیوں کی بھرپور خوبصورتی کو سراہتے ہوئے کہا: “ہمارے ملک میں بے شمار کہانیاں موجود ہیں۔
ایک وقت تھا جب میں سنجے لیلا بھنسالی کی فلم میں کسی ملکہ کا کردار ادا کرنا چاہتی تھی اور زویا اختر کی فلم میں ایک جدید دور کی لڑکی بننا چاہتی تھی۔
یہ دونوں خواہشات آج بھی میرے دل میں موجود ہیں۔ میں بس ایک ایسی جدید بھارتی لڑکی کی کہانی دکھانا چاہتی ہوں جو خواب دیکھتی ہو، آگے بڑھنے کی خواہش رکھتی ہو اور اپنی منزل کے لیے ہر ممکن کوشش کرتی ہو۔”
