آپ کا جانشین صوبے کی قید سے آزادہوگیا؛ نادرا سرٹیفکیٹ کہیں سے بھی حاصل کریں

نیشنل ڈیٹابیس اینڈ رجسٹریشن اتھارٹی (نادرا) نے وراثتی معاملات کو سہل بناتے ہوئے شہریوں کے لیے جانشینی سرٹیفکیٹ حاصل کرنے کا عمل نہایت آسان کر دیا ہے۔ اب قانونی ورثا کو وراثتی جائیداد کی صوبائی حدود کی پابندیوں سے نجات مل گئی ہے۔

نادرا کے تازہ اعلان کے مطابق اب ملک بھر کے کسی بھی صوبے پنجاب، سندھ، بلوچستان، خیبرپختونخوا، یا گلگت بلتستانمیں موجود 186 جانشینی سہولت مراکز یا نادرا دفاتر میں جانشینی سرٹیفکیٹ کے لیے درخواست دی جا سکتی ہے چاہے جائیداد پاکستان کے کسی بھی حصے میں ہو۔ اس سے پہلے شہریوں کو اس صوبے تک محدود رہنا پڑتا تھا جہاں جائیداد واقع ہے جس سے کئی شہریوں کو مشکلات کا سامنا تھا۔

اس کے علاوہ بائیو میٹرک تصدیق کا عمل بھی جدید اور شہری دوست بنایا گیا ہے۔ قانونی ورثا اب نادرا کے قریبی مرکز پر جا کر یا نادرا کی پاک آئی ڈی موبائل ایپ کے ذریعے گھر بیٹھے یہ تصدیق مکمل کر سکتے ہیں۔ یہ سہولت پہلے بھی ایپ پر متعارف کرائی گئی تھی لیکن اب درخواست جمع کرانے کی صوبائی پابندی ختم ہونے سے یہ عمل مزید سہل ہو گیا ہے۔

نادرا ترجمان کے مطابق، اس نئی سہولت کے نفاذ کے لیے تمام متعلقہ دفاتر کو ہدایات جاری کر دی گئی ہیں۔ یہ اقدام شہریوں کے لیے وقت اور وسائل کی بچت کا باعث بنے گا جس سے وہ بغیر کسی اضافی پریشانی کے اپنے وراثتی حقوق حاصل کر سکیں گے۔