گوگل نیوز پر ہمیں فالو کریںبھارت کے مقبول رئیلٹی شو بگ باس کا 19 واں سیزن شروع ہو چکا ہے جس میں مختلف شعبوں سے تعلق رکھنے والے کئی معروف چہرے شرکت کر رہے ہیں۔ ان میں سے ایک ہیں کشمیر سے تعلق رکھنے والی فرحانہ بھٹ جو اپنی دلکش شخصیت اور خوبصورتی سے ناظرین کے دلوں پر راج کر رہی ہیں۔
فرحانہ بھٹ نہ صرف ایک باصلاحیت اداکارہ ہیں بلکہ ایک پرجوش سماجی کارکن بھی ہیں۔ انہوں نے اپنے فلمی کیریئر کا آغاز 2016 میں فلم سنشائن میوزک ٹورز اینڈ ٹریولز سے کیا جس میں انہوں نے سنی کوشل کے ساتھ کام کیا۔ اس کے بعد وہ لیلا مجنوں اور نوٹ بک جیسی فلموں میں اپنی اداکاری کے جوہر دکھا چکی ہیں۔ ان فلموں کے علاوہ وہ کئی آزاد پروجیکٹس اور میوزک ویڈیوز میں بھی نظر آئیں جہاں ان کی پرفارمنس کو خوب سراہا گیا۔
تعلیمی اعتبار سے فرحانہ نے ماس کمیونیکیشن میں گریجویشن کیا اور مشہور اداکار انوپم کھیر کی اکیڈمی سے اداکاری کی تربیت حاصل کی۔ اداکاری کے ساتھ ساتھ وہ ڈانس میں بھی کمال کی مہارت رکھتی ہیں۔ ان کی صلاحیتوں کا دائرہ صرف فن تک محدود نہیں، بلکہ وہ تائیکوانڈو میں بھی ماہر ہیں اور پانچ بار قومی چیمپئن رہ چکی ہیں۔
فرحانہ سماجی مسائل پر بات کرنے سے بھی نہیں ہچکچاتیں۔ وہ ایک پرامن معاشرے کی وکالت کرتی ہیں اور اپنی آواز سے کئی اہم موضوعات کو اجاگر کرتی ہیں۔ سوشل میڈیا پر ان کی مقبولیت کا اندازہ اس بات سے لگایا جا سکتا ہے کہ انسٹاگرام پر ہزاروں مداح ان کی ایک جھلک کے منتظر رہتے ہیں۔ ان کی تصاویر پر مداحوں کی طرف سے محبت اور تعریفی تبصروں کی برسات ہوتی ہے۔
بگ باس 19 میں ان کی شاندار انٹری نے ناظرین میں جوش و خروش پیدا کر دیا ہے۔ شو کے دوران انہوں نے اپنی زندگی کے کچھ ذاتی پہلوؤں کا ذکر کیا جیسا کہ وہ محض آٹھ سال کی عمر سے اپنے خاندان کی ذمہ داریاں نبھا رہی ہیں۔ ان کی سادگی اور بے باک انداز کو ناظرین بے حد پسند کر رہے ہیں۔
اب یہ دیکھنا دلچسپ ہوگا کہ فرحانہ بھٹ بگ باس کے اس سفر میں کس طرح اپنی جگہ بناتی ہیں۔ کیا وہ شو کی فاتح بنیں گی یا پھر کوئی نیا رنگ دکھائیں گی؟ ان کا یہ سفر یقیناً ناظرین کے لیے ایک شاندار تجربہ ثابت ہوگا۔
