گوگل نیوز پر ہمیں فالو کریںکراچی میں حالیہ موسلا دھار بارشوں کے بعد جلدی امراض کے مریضوں کی تعداد میں نمایاں اضافہ دیکھنے میں آیا ہے۔
ماہر امراض جلد ڈاکٹر عبداللہ یحییٰ کے مطابق چمڑا اسپتال میں روزانہ تقریباً پانچ ہزار مریض جلدی بیماریوں کے علاج کے لیے آرہے ہیں۔ ان کا کہنا ہے کہ یہ اضافہ مون سون بارشوں کے فوراً بعد شروع ہوا۔
ڈاکٹر عبداللہ نے وضاحت کی کہ گندے پانی اور کھلے مین ہولز کے باعث فنگس اور بیکٹیریا پر مبنی انفیکشن تیزی سے پھیل رہے ہیں۔ اس کے علاوہ بارشوں کے بعد جمع شدہ پانی میں پرجیوی امراض بھی بڑھ رہے ہیں جو شہریوں کے لیے خطرہ بن سکتے ہیں۔
دوسری جانب ماہر امراض جلد ڈاکٹر رابعہ نے بتایا کہ سول اسپتال کے او پی ڈی میں روزانہ 500 سے 600 مریض جلدی امراض کے ساتھ آرہے ہیں جبکہ جناح اسپتال میں یہ تعداد روزانہ 600 سے زائد ہو گئی ہے۔
ڈاکٹر رابعہ نے شہریوں کو خبردار کیا کہ وہ آلودہ پانی اور غیر صحت مند ماحول سے بچیں اور ذاتی صفائی کا خاص خیال رکھیں کیونکہ بارش کے دوران اور بعد میں ذاتی حفظان صحت ہی ان بیماریوں سے بچاؤ کا مؤثر ذریعہ ہے۔
