گوگل نیوز پر ہمیں فالو کریںچین کی اداکارہ زن ژی لی نے وینس فلم فیسٹیول میں بہترین اداکارہ کا اعزاز حاصل کر لیا ہے، انہیں یہ ایوارڈ فلم “The Sun Rises on Us All” میں بہترین اداکاری پر دیا گیا جس کی ہدایت کاری سائی شانگ جن نے کی ہے۔
فلم میں زن ژی لی نے ایک ایسی عورت کا کردار ادا کیا ہے جو اپنے سابق محبوب سے صلح کرنا چاہتی ہے۔ یہ وہی شخص ہے جس نے ایک ایسے جرم کی سزا کاٹی جو دراصل اس نے خود کیا تھا۔ زن کا یہ کردار جذباتی پیچیدگیوں سے بھرپور تھا اور ان کی اداکاری کو ناقدین نے خوب سراہا ہے۔
ایوارڈ وصول کرتے وقت زن ژی لی نے کہا کہ وہ اپنے اس مقام پر پہنچنے پر فخر محسوس کرتی ہیں اور یہ ان کے لیے ایک بڑا اعزاز ہے کہ وہ دنیا بھر کے باصلاحیت فنکاروں کے درمیان کھڑی ہیں۔
فلم کی کہانی میں زیادہ تر جذبات بغیر بولے ادا کیے گئے ہیں۔ کرداروں کے اندر کے دکھ، پچھتاوے اور پرانی یادیں فلم کی خاموشی میں جھلکتی ہیں۔ زن نے کہا کہ کردار کی گہرائی اور اس کی سچائی نے انہیں بہت متاثر کیا۔
نقادوں نے زن ژی لی اور ان کے ساتھی اداکار ژانگ سونگ وین کی جوڑی کو سراہا، جنہوں نے ایسے سابق عاشقوں کا کردار ادا کیا جن کے درمیان جذبہ تو ختم ہو چکا ہے لیکن تقدیر اب بھی ان کو ایک دوسرے سے جوڑے ہوئے ہے۔
زن ژی لی نے اس سے قبل 2016 میں فلم “Crosscurrent” سے شہرت حاصل کی تھی جو برلن فلم فیسٹیول میں واحد ایشیائی فلم تھی اور سنیماٹوگرافی کا ایوارڈ جیت چکی تھی۔ اس کے بعد وہ کئی چینی فلموں اور ٹی وی سیریلز کا حصہ رہ چکی ہیں۔
2023 میں ریلیز ہونے والی کامیاب سیریز “Blossom Shanghai” میں ان کا کردار بھی کافی مقبول ہوا جسے ہانگ کانگ کے مشہور ہدایتکار وانگ کار وائی نے ڈائریکٹ کیا تھا۔
زن نے بتایا کہ وہ شاہانہ انداز سے جُڑے مزاحیہ پروگراموں سے پرہیز کرتی ہیں تاکہ ان کے کردار کی سنجیدگی برقرار رہے۔ ان کے مطابق شہرت کے ساتھ کچھ مشکلات بھی آتی ہیں کیونکہ کئی بار لوگ انہیں شاہانہ زندگی گزارنے والی اداکارہ سمجھ کر خریداری کے دوران زیادہ رقم طلب کرتے ہیں۔
