گوگل نیوز پر ہمیں فالو کریںاداکارہ تنو شری دتہ نے انکشاف کیا ہے کہ گزشتہ گیارہ برسوں سے انہیں بگ باس میں شرکت کی پیشکش کی جا رہی ہے لیکن وہ ہر سال اسے صاف طور پر مسترد کر دیتی ہیں۔
بالی ووڈ ٹھکانا کو دیے گئے ایک انٹرویو میں ان کا کہنا تھا کہ پروگرام کے منتظمین مسلسل ان سے رابطہ کرتے ہیں مگر وہ ہر بار انہیں ڈانٹ کر منع کر دیتی ہیں۔
تنو شری نے واضح کیا کہ وہ ایسی جگہ پر نہیں رہ سکتیں جہاں محدود آزادی ہو، یہاں تک کہ وہ اپنے خاندان کے ساتھ بھی ایک ہی جگہ پر نہیں رہتیں کیونکہ ہر فرد اپنی الگ پرائیویسی چاہتا ہے۔
اداکارہ نے مزید بتایا کہ بگ باس انتظامیہ نے انہیں ایک کروڑ 65لاکھ روپے کی پیشکش بھی کی تھی کیونکہ اسی قدر رقم ایک اور معروف بالی ووڈ اداکارہ کو دی گئی تھی جنہیں ان کے برابر کا سمجھا جاتا تھا۔
حتیٰ کہ ایک اسٹائلسٹ، جو بگ باس مینجمنٹ سے منسلک ہے، نے کہا کہ اس رقم میں مزید اضافہ بھی کیا جا سکتا ہے لیکن تنو شری نے صاف طور پر انکار کر دیا۔ ان کا کہنا تھا کہ وہ ایسی بندشوں والی زندگی گزارنے کا تصور بھی نہیں کر سکتیں۔
