گوگل نیوز پر ہمیں فالو کریںہالی وڈ کی معروف اداکارہ سڈنی سوینی نے 2025 کے ایمی ایوارڈز میں بطور پریزنٹر ریڈ کارپٹ پر شرکت کی اور اپنے دلکش انداز سے سب کو متاثر کر دیا۔
وہ آسکر ڈی لا رینٹا کا تیار کردہ ریشمی اور بغیر آستینوں والا سرخ لباس زیبِ تن کیے ہوئے تھیں ،کیمروں کی روشنیوں میں سوینی کا اعتماد بھرا انداز اور مسکراہٹ ایوارڈ تقریب کے سب سے نمایاں لمحات میں شمار ہوا۔
ایوارڈ تقریب میں سڈنی سوینی کو کسی نامزدگی میں شامل نہیں کیا گیا تاہم ان کا مشہور ڈرامہ یوفوریا تیسرے سیزن کے ساتھ رواں برس ریکارڈ کیا گیا ہے اور اس کی ریلیز کے بعد وہ آئندہ سال ایمی ایوارڈز کے لیے اہل قرار دی جا سکتی ہیں۔
سڈنی سوینی نے حال ہی میں ایک انٹرویو میں بتایا کہ وہ اپنے کام کو بے حد پسند کرتی ہیں اور اسی وجہ سے خود کو مسلسل مصروف رکھتی ہیں۔ ان کے مطابق اگر انسان اپنے کام سے محبت کرتا ہو تو یہ کبھی بوجھ نہیں لگتا بلکہ روزانہ اس پر محنت کرنے کا دل چاہتا ہے۔
انہوں نے مزید کہا کہ اگرچہ وہ چھ ماہ کا وقفہ لینے کے بارے میں سوچ بھی نہیں سکتیں کیونکہ یہ انہیں بے چینی میں مبتلا کر دیتا ہے تاہم وہ نئے اور دلچسپ پروجیکٹس کے لیے وقت ضرور نکالتی ہیں۔
سڈنی سوینی کا کہنا تھا کہ وہ چاہیں تو آئندہ تین سے چار سال کے لیے اپنے تمام شیڈول لاک کر سکتی ہیں لیکن وہ کچھ مواقع کھلے چھوڑنا پسند کرتی ہیں۔ اداکارہ نے آن لائن تبصروں کے حوالے سے بھی کہا کہ وہ عوام کی رائے پر نظر رکھتی ہیں لیکن اسے اپنے اوپر حاوی نہیں ہونے دیتیں۔
