گوگل نیوز پر ہمیں فالو کریںکراچی: گُل احمد ٹیکسٹائل ملز لمیٹڈ نے منگل کے روز بورڈ آف ڈائریکٹرز کے اجلاس کے بعد اپنے ایکسپورٹ اپیرل سیگمنٹ کو بند کرنے کا باضابطہ اعلان کردیا۔
کمپنی نے اس فیصلے سے پاکستان اسٹاک ایکسچینج لمیٹڈ کو بھی آگاہ کردیا ہے جو سیکشن 96 سیکیورٹیز ایکٹ 2015 کے تحت لازمی ہے۔
کمپنی کے مطابق یہ فیصلہ سیگمنٹ کی کارکردگی اور مستقبل کے امکانات کے جامع اسٹریٹجک جائزے کے بعد کیا گیا۔ ایکسپورٹ اپیرل سیگمنٹ جو کہ محنت طلب شعبہ ہے طویل عرصے سے شدید مالی دباؤ اور منافع میں کمی کا شکار رہا۔
انتظامیہ کا کہنا ہے کہ اس شعبے کو خطے میں سخت مسابقت، روپے کی قدر میں بہتری، نامزد کپڑوں کی بڑھتی ہوئی قیمتوں اور توانائی ٹیرف میں اضافے نے نقصان پہنچایا۔
اس کے ساتھ ساتھ حکومت کی حالیہ پالیسی تبدیلیوں، جیسے ایڈوانس ٹرن اوور ٹیکس میں اضافہ، نے بھی حالات کو مزید مشکل بنایا۔
کیا پیٹرول اور ڈیزل پھر مہنگا ہونے جا رہا ہے؟ عوام کے لیے بری خبر تیار
کمپنی نے وضاحت کی کہ یہ تمام عوامل مل کر اس سیگمنٹ کے اخراجاتی ڈھانچے اور منافع بخشی کو بری طرح متاثر کر رہے تھے، جس کے نتیجے میں مسلسل آپریشنل نقصانات سامنے آئے۔
گُل احمد کو توقع ہے کہ اس اسٹریٹجک بندش سے مجموعی مالی صورتحال پر مثبت اثر پڑے گا، قرضوں میں کمی آئے گی اور کیش فلو مینجمنٹ بہتر ہوگی، جس سے کمپنی اپنی پائیدار ترقی کی حکمت عملی پر زیادہ توجہ دے سکے گی۔
کمپنی نے مزید کہا کہ یہ فیصلہ صرف ایکسپورٹ اپیرل سیگمنٹ تک محدود ہے جبکہ ہوم ٹیکسٹائل، اسپننگ اور ویونگ جیسے دیگر بڑے شعبے بدستور کام کرتے رہیں گے اور کمپنی کی طویل مدتی ترقی کی حکمت عملی کا اہم حصہ رہیں گے۔
