گوگل نیوز پر ہمیں فالو کریںمحکمہ موسمیات نے خبردار کیا ہے کہ بحیرہ عرب میں موجود ہوا کا کم دباؤ شدت اختیار کر کے ڈپریشن میں تبدیل ہو گیا ہے جو اس وقت سندھ کے ساحل سے تقریباً 400 کلو میٹر جنوب میں موجود ہے۔
اس صورتحال کے باعث ٹراپیکل سائیکلون وارننگ سینٹر کراچی نے جمعہ کے روز سائیکلون الرٹ جاری کر دیا۔
محکمہ موسمیات کے مطابق یہ نظام 21 ڈگری شمالی عرض بلد اور 67اعشاریہ 9 ڈگری مشرقی طول بلد پر موجود ہے اور بحیرہ عرب میں حرکت کر رہا ہے۔
اگلے 24 گھنٹوں میں اس موسمی نظام کے اثرات سندھ کے ساحلی اضلاع پر بارش، گرج چمک اور تیز ہواؤں کی صورت میں متوقع ہیں۔
تھرپارکر، عمرکوٹ، بدین، ٹھٹھہ، سجاول، ٹنڈو محمد خان، حیدرآباد، مٹیاری، جامشورو اور کراچی میں ہلکی بارش کے امکانات ہیں۔
ان علاقوں کے رہائشیوں کو احتیاطی تدابیر اختیار کرنے کی ہدایت کی گئی ہے کیونکہ غیر مستحکم موسمی صورتحال برقرار رہے گی۔
محکمہ موسمیات نے خبردار کیا ہے کہ سندھ کے ساحل کے قریب 40 سے 50 کلومیٹر فی گھنٹہ کی رفتار سے تیز ہوائیں چلنے کا امکان ہے جبکہ سمندر میں بلند لہریں اور خراب موسم کی وجہ سے چھوٹی کشتیوں اور ماہی گیروں کے لیے بحیرہ عرب انتہائی خطرناک ہو جائے گا۔
ماہی گیروں کو سختی سے ہدایت کی گئی ہے کہ وہ 3 اکتوبر تک گہرے سمندر میں نہ جائیں۔ اس کے علاوہ ساحلی اور بندرگاہی حکام کو بھی ہائی الرٹ کر دیا گیا ہے اور متعلقہ اداروں کو کسی بھی ہنگامی صورتحال سے نمٹنے کے لیے تیار رہنے کی ہدایت جاری کی گئی ہے۔
