گوگل نیوز پر ہمیں فالو کریںواشنگٹن: امریکی خاتون اول ملانیا ٹرمپ کی جانب سے سوشل میڈیا پر شیئر کی گئی ایک منفرد اور مصنوعی ذہانت سے تیار کردہ ویڈیو نے عالمی سطح پر انٹرنیٹ صارفین کو حیران کر دیا ہے۔
یہ ویڈیو سب سے پہلے ایک سوشل میڈیا اکاؤنٹ پر پوسٹ کی گئی جسے بعد میں ملانیا ٹرمپ نے خود دوبارہ شیئر کیا۔ اس ویڈیو کی وجہ سے نہ صرف صارفین میں تجسس بڑھا بلکہ اس نے جدید ٹیکنالوجی، سیاست اور فیشن کو یکجا کر کے ایک نئے طرز کی ڈیجیٹل شناخت بھی قائم کر دی ہے۔
ویڈیو کا عنوان انٹو دی فیوچر رکھا گیا ہے جس میں ملانیا ٹرمپ کی ڈیجیٹل شکل کو پکسلز سے ابھرتے ہوئے دکھایا گیا ہے جو بعد ازاں ٹرمپ ٹاور کے شاندار اندرونی حصے میں کھڑی نظر آتی ہے۔
ویڈیو میں وہ ایک گہرے رنگ کے باوقار لباس اور اپنے منفرد ہیئر اسٹائل کے ساتھ دکھائی دیتی ہیں۔ اس غیر معمولی انداز اور مصنوعی ذہانت پر مبنی پیشکش نے صارفین کو اس پیغام اور مقصد کے بارے میں سوچنے پر مجبور کر دیا ہے جو اس ویڈیو کے پیچھے ہو سکتا ہے۔
یہ ویڈیو سوشل میڈیا پر تیزی سے وائرل ہوئی اور محض چند گھنٹوں میں لاکھوں ناظرین نے اسے دیکھا۔ کچھ صارفین نے اس پر حیرت کا اظہار کیا جبکہ دیگر نے اسے پراسرار اور معنی خیز قرار دیا۔
کئی لوگوں نے اس ویڈیو کے حوالے سے مختلف تبصرے کیے جن میں سے کچھ نے اسے مستقبل کا تصور قرار دیا اور بعض نے کہا کہ یہ ڈیجیٹل دور میں سیاست، فیشن اور ٹیکنالوجی کے امتزاج کی ایک نئی مثال ہے۔
رپورٹس کے مطابق یہ ویڈیو دراصل ملانیا ٹرمپ کے کرپٹو منصوبے ملانیا سے بھی جڑی ہے جو ان کی ڈیجیٹل شناخت کو مضبوط کرنے کی ایک کوشش ہے۔
سوشل میڈیا صارفین نے مختلف تجزیاتی اور فلسفیانہ ریمارکس دیتے ہوئے اسے ایک علامتی پیغام قرار دیا ہے جو شاید یہ باور کراتا ہے کہ ٹرمپ خاندان اپنی ڈیجیٹل حکمت عملی کے ایک نئے دور میں داخل ہو رہا ہے۔
