گوگل نیوز پر ہمیں فالو کریںمنگل کی شب کراچی کے آسمان پر سال کے سب سے دلکش فلکی مظاہروں میں سے ایک، “ہارویسٹ سپرمون” (Harvest Supermoon) نے اپنی خیرہ کن چمک سے رات کو منور کردیا۔
اس دلکش منظر کو دیکھنے کے لیے شہری بڑی تعداد میں ساحلِ سمندر اور واٹر فرنٹس کا رخ کرتے نظر آئے تاکہ چاند کی اس شاندار جھلک کو کیمرے میں محفوظ کر سکیں۔
یہ مظہر اُس وقت پیدا ہوتا ہے جب چاند اپنی بیضوی گردش کے دوران زمین کے قریب ترین مقام، جسے “پیریجی” (Perigee) کہا جاتا ہے، پر ہوتا ہے اور ساتھ ہی پورا چاند بھی ہوتا ہے۔ نتیجتاً چاند معمول سے کہیں زیادہ بڑا اور روشن دکھائی دیتا ہے۔
پاکستان کی خلائی تحقیقاتی ایجنسی “سپارکو” کے مطابق اکتوبر کا یہ سپرمون عام فل مون کے مقابلے میں تقریباً 6.6 فیصد بڑا اور 13 فیصد زیادہ روشن تھا۔ یہ اپنی پوری چمک پر مقامی وقت کے مطابق رات 8 بج کر 47 منٹ پر (0347 جی ایم ٹی) پہنچا۔
شہریوں کی بڑی تعداد سی ویو اور کلفٹن بیچ جیسے مشہور مقامات پر جمع ہوئی، جہاں سنہری روشنی سے دمکتا چاند بحیرۂ عرب کے پانیوں پر اپنا عکس بکھیر رہا تھا، گویا سمندر پر کسی نے روشنی کا جال بچھا دیا ہو۔
سپارکو کے مطابق یہ 2025 کا پہلا سپرمون تھا، جبکہ اگلے دو سپرمونز بالترتیب 5 نومبر اور 5 دسمبر کو نظر آئیں گے۔
سال کا سب سے روشن سپرمون نومبر میں متوقع ہے، جب چاند زمین سے محض 221,817 میل (357,067 کلومیٹر) کے فاصلے پر ہوگا۔ ماہرینِ فلکیات کے مطابق وہ منظر بھی دنیا بھر کے شائقین کے لیے سانسیں روک دینے والا نظارہ ثابت ہوگا۔
