گوگل نیوز پر ہمیں فالو کریںپنجاب حکومت نے صوبے بھر میں کم آمدنی والے اور مستحق خاندانوں کے لیے 57 ہزار گھروں کی تعمیر کا بڑا منصوبہ شروع کرنے کا اعلان کر دیا ہے۔ یہ مکانات آسان اقساط پر فراہم کیے جائیں گے تاکہ کم آمدنی والے افراد بھی اپنے گھر کے مالک بن سکیں۔
پنجاب ہاؤسنگ ڈیپارٹمنٹ کے ترجمان کے مطابق یہ منصوبہ معیاری اور کم لاگت رہائشی سہولتیں فراہم کرنے کے لیے تیار کیا گیا ہے جس کی نگرانی براہِ راست محکمہ ہاؤسنگ کرے گا۔
پہلے مرحلے میں 20 ہزار گھروں کی تعمیر شروع کی جائے گی جو پنجاب کے 41 مختلف مقامات پر واقع ہوں گے۔ حکومت نے اس مقصد کے لیے سرکاری اراضی کو پنجاب ہاؤسنگ اینڈ ٹاؤن پلاننگ ایجنسی کے نام منتقل کرنے کی منظوری بھی دے دی ہے۔
یہ گھروں کی تعمیر 24 اضلاع میں سرکاری زمین پر کی جائے گی، جہاں مختلف سائز اور ڈیزائن کے مکانات تعمیر کیے جائیں گے۔
16 اضلاع میں 250 مربع فٹ کے ایک منزلہ یونٹس، پانچ اضلاع میں 530 مربع فٹ کے تین منزلہ عمارتیں، جبکہ تین اضلاع میں 550 مربع فٹ کے چار منزلہ رہائشی بلاکس تعمیر کیے جائیں گے۔
محکمہ ہاؤسنگ کے مطابق یہ پانچ سالہ منصوبہ ماحول دوست طرزِ زندگی کے لیے تیار کیا جا رہا ہے جس میں سولر انرجی سسٹم اور بارش کے پانی کے ذخیرہ کرنے کا نظام شامل ہوگا۔
یہ منصوبہ عالمی بینک اور نجی شعبے کے اشتراک سے مکمل کیا جائے گا تاکہ بین الاقوامی تعمیراتی معیار، بہتر سہولتیں اور مؤثر نگرانی یقینی بنائی جا سکے۔
حکام کا کہنا ہے کہ منصوبے کے ہر مرحلے پر کوالٹی کنٹرول کو یقینی بنایا جائے گا جبکہ مکینوں کو بنیادی ضروریات جیسے پانی، بجلی، نکاسیِ آب اور صاف ستھرا رہائشی ماحول فراہم کیا جائے گا۔
یہ اقدام نہ صرف کم آمدنی والے طبقے کے لیے ایک بڑا ریلیف ثابت ہوگا بلکہ صوبے میں پائیدار شہری ترقی کی جانب ایک مثبت قدم سمجھا جا رہا ہے۔
