گوگل نیوز پر ہمیں فالو کریںبھارتی فلم نگری کے بادشاہ کہلانے والے اداکار شاہ رخ خان اور ان کی اہلیہ گوری خان نے شادی کے 33 سال مکمل کر لیے ہیں۔ یہ جوڑا 25 اکتوبر 1991 کو رشتہ ازدواج میں منسلک ہوا تھا اور آج اپنی طویل اور مثالی ازدواجی زندگی کی سالگرہ منا رہا ہے۔
شاہ رخ اور گوری کی ملاقات 1984 میں دہلی میں ہوئی تھی، اُس وقت شاہ رخ فلم انڈسٹری میں قدم رکھنے کی تیاری کر رہے تھے۔
دونوں کے درمیان تعلق محبت میں بدلا تو کئی سماجی اور مذہبی رکاوٹیں سامنے آئیں کیونکہ شاہ رخ مسلمان جبکہ گوری ہندو خاندان سے تعلق رکھتی تھیں تاہم دونوں نے اپنے خلوص، ثابت قدمی اور ایک دوسرے کے احترام سے ہر مشکل کو محبت کے جذبے سے جیت لیا۔
شاہ رخ اور گوری نے 25 اکتوبر 1991 کو تین مختلف طرز کی شادیاں کیں تاکہ دونوں خاندانوں کی روایات کا احترام کیا جا سکے۔
ان میں ایک عدالت میں رجسٹرڈ نکاح، دوسرا اسلامی نکاح اور تیسرا ہندو رسم و رواج کے مطابق شادی کی تقریب شامل تھی۔ یہ قدم بھارت میں مذہبی ہم آہنگی اور باہمی رواداری کی ایک خوبصورت مثال کے طور پر دیکھا گیا۔
شاہ رخ اور گوری خان نے اپنی ازدواجی زندگی کے دوران نہ صرف محبت کو قائم رکھا بلکہ ایک مضبوط خاندان اور کامیاب پیشہ ورانہ زندگی بھی بنائی۔
دونوں مل کر فلم پروڈکشن کمپنی کے شریک مالک ہیں، جبکہ گوری خان نے انٹیریئر ڈیزائننگ کے میدان میں اپنی الگ شناخت قائم کی۔
اس جوڑے کے تین بچے ہیں۔ بڑا بیٹا آریان خان 1997 میں پیدا ہوا اور فلم میکنگ کے شعبے میں قدم رکھ چکا ہے۔
بیٹی سہانا خان 2000 میں پیدا ہوئیں اور 2023 میں اداکاری کے میدان میں ڈیبیو کر چکی ہیں، جب کہ سب سے چھوٹا بیٹا ابرام خان 2013 میں سروگیسی کے ذریعے پیدا ہوا۔
شاہ رخ اور گوری نے ہمیشہ اپنے بچوں کی تربیت اس انداز میں کی کہ وہ دونوں مذاہب اسلام اور ہندو مت کی تعلیمات اور اقدار کا احترام کرتے ہیں۔ یہی ہم آہنگی اور رواداری ان کے رشتے کی سب سے بڑی طاقت ہے۔
33 سال بعد بھی شاہ رخ اور گوری خان کا رشتہ بھارتی فلم انڈسٹری میں محبت، عزت اور وفاداری کی سب سے حسین علامت سمجھا جاتا ہے۔
