گوگل نیوز پر ہمیں فالو کریںکراچی کے پوش علاقے ڈیفنس ویو کے قریب سندھ سالڈ ویسٹ مینجمنٹ کمپنی کی جانب سے قائم کردہ ڈمپنگ پوائنٹ شہریوں کے لیے شدید اذیت کا باعث بن گیا ہے۔
مقامی رہائشیوں کے مطابق اس مقام پر روزانہ بڑی مقدار میں کچرا پھینکا اور بعدازاں جلایا جاتا ہے جس سے علاقے میں بدبو اور گھنا دھواں پھیل جاتا ہے۔ یہ صورتحال نہ صرف ماحول کو آلودہ کر رہی ہے بلکہ شہریوں کی صحت پر بھی منفی اثرات مرتب کر رہی ہے۔
علاقہ مکینوں کا کہنا ہے کہ روزانہ جلنے والے کچرے سے اٹھنے والا دھواں فضا میں زہریلے ذرات بھر دیتا ہے، جس کے نتیجے میں بچوں اور بزرگوں میں سانس اور آنکھوں کی بیماریوں میں اضافہ ہو رہا ہے۔
تعفن اور دھویں کے باعث رہائشیوں کے لیے گھروں میں رہنا بھی مشکل ہوگیا ہے جبکہ فضائی آلودگی کا مجموعی تناسب خطرناک حد تک بڑھ چکا ہے۔
شہریوں نے حکامِ بالا سے مطالبہ کیا ہے کہ اس ماحولیاتی اور صحتِ عامہ کے سنگین مسئلے کا فوری نوٹس لیا جائے اور ڈیفنس ویو کے قریب موجود ڈمپنگ پوائنٹ کو رہائشی علاقے سے فوری طور پر ہٹایا جائے۔
ان کا کہنا ہے کہ سندھ سالڈ ویسٹ مینجمنٹ کمپنی کو اپنی ذمہ داریاں مؤثر انداز میں ادا کرنی چاہئیں اور کچرے کے ٹھکانے لگانے کے لیے ماحول دوست اور جدید طریقہ کار اپنانا چاہیے تاکہ شہریوں کو اس اذیت ناک صورتحال سے نجات مل سکے۔
رہائشیوں نے یہ بھی مطالبہ کیا کہ اگر فوری اقدامات نہ کیے گئے تو یہ مسئلہ صرف بدبو یا دھویں تک محدود نہیں رہے گا بلکہ مستقبل میں بڑے پیمانے پر صحت کے بحران کو جنم دے سکتا ہے۔
