گوگل نیوز پر ہمیں فالو کریںحیدرآباد: لطیف آباد کے علاقے میں آتش بازی کے ایک کارخانے میں زور دار دھماکے سے دو افراد جاں بحق جبکہ متعدد زخمی ہو گئے۔
اسسٹنٹ کمشنر نے واقعے کی تصدیق کرتے ہوئے بتایا کہ دھماکے کے فوراً بعد کارخانے میں آگ بھڑک اٹھی جس کے نتیجے میں عمارت کا ایک حصہ بھی منہدم ہوگیا۔
عینی شاہدین کے مطابق دھماکے کی آواز دور دور تک سنائی دی جس کے بعد علاقے میں خوف و ہراس پھیل گیا۔
آگ نے دیکھتے ہی دیکھتے پورے کارخانے کو لپیٹ میں لے لیا جبکہ فائر بریگیڈ اور ریسکیو ٹیمیں موقع پر پہنچ کر امدادی کارروائیاں انجام دیتی رہیں۔
زخمیوں کو قریبی اسپتال منتقل کیا گیا جہاں متعدد کی حالت تشویش ناک بتائی جا رہی ہے۔
واقعے کی اطلاع ملتے ہی پولیس اور متعلقہ اداروں نے علاقے کو گھیرے میں لے لیا اور کارخانے میں موجود کیمیکل اور آتش گیر مواد کے حوالے سے تحقیقات شروع کر دی ہیں۔
حکام نے کہا ہے کہ واقعے کی اصل وجہ کا تعین تفتیش کے بعد کیا جائے گا تاہم ابتدائی معلومات کے مطابق آتش گیر مواد کے غلط استعمال یا عدم حفاظت کے باعث دھماکا ہوا ہو سکتا ہے۔
حکام نے مرنے والوں کے لواحقین سے اظہارِ افسوس کرتے ہوئے کہا کہ متاثرہ عمارت کی باقی ساخت کا بھی جائزہ لیا جا رہا ہے تاکہ مزید نقصان یا دوبارہ آگ بھڑکنے کے ممکنہ خطرات کو روکا جا سکے۔
