گوگل نیوز پر ہمیں فالو کریںکراچی کے جناح انٹرنیشنل ائیرپورٹ پر کسٹمز حکام نے دو خواتین سے تقریباً ایک کروڑ 10لاکھ روپے مالیت کا سونا اور غیر ملکی کرنسی ضبط کی جو مبینہ طور پر اسمگل کرنے کی کوشش کر رہی تھیں۔
کسٹمز کلیکٹوریٹ کے بیان کے مطابق دونوں خواتین مسافر انٹرنیشنل ڈپارچر ہال میں جانچ کے دوران روکی گئیں، جہاں ایک خاتون سے 6143 امریکی ڈالر اور 2 کلوگرام سونا اور دوسری خاتون سے 5746 امریکی ڈالر اور 1اعشاریہ 5 کلوگرام سونا برآمد ہوا۔
بیان میں کہا گیا کہ ضبط شدہ سونے اور غیر ملکی کرنسی کی مجموعی مالیت تقریباً ایک کروڑ 10لاکھ روپے ہے۔
مزید بتایا گیا کہ ضبط شدہ اشیاء کسٹمز کے عملے کے قبضے میں لے لی گئیں، باضابطہ قبضہ رسیدیں جاری کی گئیں اور ابتدائی قانونی کارروائی مکمل ہونے کے بعد دونوں خواتین کے خلاف سونے اور غیر ملکی کرنسی کی اسمگلنگ کی کوشش پر ایف آئی آر درج کی گئی۔
قابل ذکر ہے کہ اس ہفتے کے آغاز میں ایک مرد کو سِیالکوٹ انٹرنیشنل ائیرپورٹ پر روکا گیا تھا جو مبینہ طور پر موبائل فونز اور غیر ملکی کرنسی اسمگل کرنے کی کوشش کر رہا تھا۔
ملزم نے بتایا کہ اس نے موبائل فونز یو اے ای سے خریدے اور پاکستان میں اسمگل کیے اور اس سال مختلف ائیرپورٹس کے ذریعے کم از کم 19 مرتبہ پاکستان اور یو اے ای کا سفر کیا۔
