گوگل نیوز پر ہمیں فالو کریںسینئر سیاستدان اور سابق وفاقی وزیر جاوید ہاشمی کی جانب سے سوشل میڈیا پلیٹ فارم ایکس (سابقہ ٹوئٹر) پر افواجِ پاکستان سے متعلق کیے گئے بے بنیاد بیانات پر ملک بھر میں شدید ردعمل دیکھنے میں آ رہا ہے۔ عوامی حلقوں اور سوشل میڈیا صارفین نے ان کے دعوؤں کو بے بنیاد اور اشتعال انگیز قرار دیتے ہوئے سخت تنقید کی ہے۔
جاوید ہاشمی نے اپنی پوسٹ میں دعویٰ کیا کہ اسرائیل اب تک حماس کو غیر مسلح کرنے میں ناکام رہا ہے اور اب یہ ذمہ داری مبینہ طور پر افواجِ پاکستان کے سپرد کی جا رہی ہے۔ انہوں نے یہ بھی کہا کہ پاکستانی افواج کو غزہ جا کر فلسطینی عوام کو غیر مسلح کرنے اور انہیں اسرائیل کے رحم و کرم پر چھوڑنے کا کہا جا رہا ہے۔
اسرائیل حماس کو اب تک disarm کرنے میں ناکام رہا ہے۔ اب یہ ڈیوٹی افواجِ پاکستان کے سپرد کی جا رہی ہے۔ غزہ جائیں، فلسطینی لوگوں کو disarm کریں اور انہیں اسرائیل کے رحم و کرم پر چھوڑ دیں۔ یہ خبر بھی سنی گئی ہے کہ شاید ہمارے کچھ سپاہی وہاں حماس کی بچھائی ہوئی سرنگیں صاف کرتے ہوئے…
— Javed Hashmi (@JavedHashmiJH) January 30, 2026
سابق وفاقی وزیر نے مزید دعویٰ کیا کہ اطلاعات ہیں کہ پاکستان کے کچھ سپاہی غزہ میں حماس کی مبینہ طور پر بچھائی گئی سرنگیں صاف کرتے ہوئے جان سے ہاتھ دھو بیٹھے تاہم ان دعوؤں کی کسی سرکاری یا معتبر ذریعے سے تصدیق نہیں ہو سکی۔
اپنے بیان میں جاوید ہاشمی نے کہا کہ پاکستان کا کردار تو قبلہ اول کے محافظ کے طور پر ہونا چاہیے تھا مگر ان کے بقول اب صورتحال اس کے برعکس دکھائی دے رہی ہے۔ انہوں نے یہ بھی دعویٰ کیا کہ بعض علما نے اسی بنیاد پر فتویٰ دیا ہے تاہم اس حوالے سے بھی کوئی مستند حوالہ سامنے نہیں آیا۔
بیان کے آخر میں انہوں نے آرمی چیف جنرل عاصم منیر کے نام سے مخاطب ہوتے ہوئے ایک سخت جملہ بھی تحریر کیا جس پر سوشل میڈیا پر مزید غم و غصہ دیکھنے میں آیا۔
سوشل میڈیا صارفین، سیاسی مبصرین اور عوامی حلقوں کا کہنا ہے کہ افواجِ پاکستان سے متعلق اس نوعیت کے غیر مصدقہ بیانات قومی سلامتی اور اداروں کے وقار کے لیے نقصان دہ ہیں اور ذمہ دار شخصیات کو اظہارِ خیال میں احتیاط برتنی چاہیے۔
جاوید ہاشمی کے بیان پر کسی حکومت، سرکاری ادارے یا افواجِ پاکستان کی جانب سے باضابطہ ردعمل سامنے نہیں آیا۔
