گوگل نیوز پر ہمیں فالو کریںبھارتی فلم و ٹی وی انڈسٹری کی معروف اداکارہ پروینا دیش پانڈے 60 سال کی عمر میں انتقال کر گئی۔ ان کے اہلخانہ نے اپنے سرکاری انسٹاگرام اکاؤنٹ پر اس افسوسناک خبر کی تصدیق کی ہے۔اداکارہ طویل عرصے سے کینسر کے عارضے میں مبتلا تھیں۔
پروینا دیش پانڈے نے اپنی پیشہ ورانہ زندگی میں فلم، ٹی وی، تھیٹر اور ویب سیریز میں شاندار اور یادگار کردار ادا کیے۔ اہلِ خانہ کے مطابق ان کی آخری رسومات 17 فروری 2026 کو ممبئی کے ہندو کریمیشن گراونڈ، چکالا پارسوادا میں سہ پہر 3 بجے ادا کی گئیں۔
پروینا دیش پانڈے نے ہندی اور مراٹھی فلم انڈسٹری میں نمایاں خدمات انجام دیں۔ وہ بالخصوص سلمان خان کی ہٹ فلم ریڈی (Ready) میں اپنے کردار کے لیے جانی جاتی تھیں۔
اپنے فلمی کیریئر میں انہوں نے دیگر مشہور فلموں جیسے ایک ولن (Ek Villain)، پارمانو: دی سٹوری آف پوکھرن (Parmanu: The Story of Pokhran)، جلیبی (Jalebi) اور گبر از بیک (Gabbar Is Back) میں بھی اداکاری کے جوہر دکھائے۔
ٹیلی ویژن پر بھی پروینا دیش پانڈے نے کئی مقبول ڈراموں میں اہم کردار ادا کیے، جن میں گھر ایک مندیر (Ghar Ek Mandir)، کم کم (Kumkum)، کرم اپنّا اپنا (Karam Apnaa Apnaa) شامل ہیں۔
پروینا دیش پانڈے نہ صرف ایک اداکارہ تھیں بلکہ ایک مضبوط اور قابل احترام فنکارہ کے طور پر ہمیشہ یاد رکھی جائیں گی جنہوں نے اپنے فن سے لاکھوں دل جیتے اور فلم و ٹی وی کے شائقین کے لیے یادگار لمحات چھوڑے۔
