گوگل نیوز پر ہمیں فالو کریںپاکستان اسٹاک ایکسچینج میں بدھ کے روز مندی دیکھی گئی اور اس دوران 100 انڈیکس میں ایک ہزار 576 پوائنٹس کی کمی ریکارڈ کی گئی۔
اسلام آباد میں امریکہ اور ایران کے مذاکرات سے متعلق غیر یقینی صورتحال نے سرمایہ کاروں کو محتاط بنا دیا۔ اس دوران بینچ مارک 100 انڈیکس میں 1576پوائنٹس کی نمایاں کمی ریکارڈ کی گئی۔
کاروبار کے اختتام پر انڈیکس 171,579.30 پوائنٹس پر بند ہوا جو کہ 1,576.49 پوائنٹس یا 0.91 فیصد کی کمی کو ظاہر کرتا ہے۔ مارکیٹ میں مجموعی طور پر دباؤ غالب رہا اور سرمایہ کاروں نے مختلف شعبوں میں فروخت کو ترجیح دی۔
اہم سیکٹرز جیسے آٹو موبائل اسمبلرز، سیمنٹ، کمرشل بینکس، آئل اینڈ گیس ایکسپلوریشن کمپنیاں، آئل مارکیٹنگ کمپنیاں، بجلی پیدا کرنے والے ادارے اور ریفائنریز سبھی اس فروخت کے دباؤ کی لپیٹ میں رہے جس سے مارکیٹ کی مجموعی کارکردگی متاثر ہوئی۔
اس سے ایک روز قبل منگل کو اسٹاک ایکسچینج میں اتار چڑھاؤ دیکھنے میں آیا تھا تاہم دن کے اختتام پر مارکیٹ مثبت زون میں بند ہونے میں کامیاب رہی۔ اس دوران سرمایہ کار محتاط رہے مگر کچھ بہتری بھی دیکھنے میں آئی۔
بینچ مارک 100 انڈیکس نے مضبوطی کا مظاہرہ کرتے ہوئے 959 پوائنٹس یا 0.56 فیصد اضافہ کیا اور 173,155.79 کی سطح پر بند ہوا جو مارکیٹ کے لیے ایک حوصلہ افزا اشارہ سمجھا گیا۔
عالمی منڈی میں بدھ کے روز تیل کی قیمتیں بڑی حد تک مستحکم رہیں اگرچہ ایشیائی تجارت کے آغاز میں تقریباً ایک ڈالر کا اضافہ دیکھا گیا تھا۔ سرمایہ کار امریکہ اور ایران کے درمیان ممکنہ امن مذاکرات اور جنگ بندی میں توسیع کے اثرات کا جائزہ لیتے رہے۔
