گوگل نیوز پر ہمیں فالو کریںعیدالاضحیٰ 2026 کی آمد کے ساتھ ہی کراچی بھر میں شہری نمازِ عید کے اوقات جاننے کے لیے متحرک ہو گئے ہیں جبکہ مختلف بڑی مساجد اور عیدگاہوں میں صبح سویرے نمازِ عید کے اجتماعات منعقد کیے جانے کی تیاریاں مکمل کر لی گئی ہیں۔ شہر کے کئی علاقوں میں نمازِ عید سورج طلوع ہونے کے فوراً بعد ادا کی جائے گی۔
کراچی میں عید کی نماز کے اوقات صبح 5 بج کر 55 منٹ سے شروع ہو کر صبح 10 بجے تک مختلف مقامات پر مقرر کیے گئے ہیں تاکہ شہری اپنی سہولت اور علاقے کے مطابق نماز ادا کر سکیں۔ اس حوالے سے مختلف مساجد اور عیدگاہوں کے اوقات اور مقامات کی تفصیلات بھی جاری کر دی گئی ہیں۔
شہر کی متعدد مساجد میں سب سے پہلی نمازِ عید صبح 5:55 پر ادا کی جائے گی جن میں جامع مسجد میمن کمپلیکس نارتھ ناظم آباد، صالح مسجد صدر، جامع مسجد عثمانیہ ناظم آباد اور جامع مسجد اشرفیہ شامل ہیں۔ اس کے علاوہ منظور کالونی، عبداللہ گبول گوٹھ اور دیگر علاقوں میں بھی اسی وقت نمازِ عید ادا ہوگی۔
صبح 6 بجے کراچی کے مختلف علاقوں میں بڑی تعداد میں نمازِ عید کے اجتماعات منعقد ہوں گے۔ ان میں کراچی میمن سوسائٹی کی جامع مسجد، اتحاد ٹاؤن، بنارس، قاسم کالونی، گرو مندر، جمشید روڈ، نارتھ کراچی، لیاری، گلستانِ جوہر اور بفرزون سمیت کئی اہم مقامات شامل ہیں۔
اسی طرح 6:15، 6:20، 6:30، 6:45 اور 7 بجے بھی شہر کی مختلف جامع مساجد، عیدگاہ اور کھلے میدانوں میں نمازِ عید ادا کی جائے گی جہاں ہزاروں شہری شریک ہوں گے۔ بلدیہ ٹاؤن، ملیر، لیاری، لانڈھی، کورنگی، ناظم آباد، گلشنِ اقبال، سرجانی ٹاؤن اور اورنگی ٹاؤن سمیت تقریباً تمام بڑے علاقوں میں نمازِ عید کے اجتماعات ہوں گے۔
بعض مقامات پر نمازِ عید کے اوقات صبح 7:15، 7:30، 7:45 اور 8 بجے بھی مقرر کیے گئے ہیں جبکہ چند مساجد میں 8:30، 9 اور 10 بجے تک نمازِ عید ادا کی جائے گی تاکہ زیادہ سے زیادہ افراد اس مقدس عبادت میں شریک ہو سکیں۔
عیدالاضحیٰ اسلامی کیلنڈر کے مطابق 10 ذوالحج کو منائی جاتی ہے جو یومِ عرفہ کے فوراً بعد آتا ہے۔ یہ دن حضرت ابراہیمؑ کی عظیم قربانی کی یاد اور اللہ تعالیٰ کی اطاعت و فرمانبرداری کے جذبے کی علامت سمجھا جاتا ہے۔
یہ تہوار حج سے بھی گہرا تعلق رکھتا ہے کیونکہ اسی مہینے میں لاکھوں مسلمان مکہ مکرمہ میں فریضۂ حج ادا کرتے ہیں، جو اسلام کے پانچ بنیادی ارکان میں شامل ہے۔
عید کے دنوں میں مسلمان تکبیرات کا خصوصی اہتمام بھی کرتے ہیں اور اللہ اکبر، اللہ اکبر، لا الٰہ الا اللہ واللہ اکبر، اللہ اکبر وللہ الحمد کی صدائیں ہر طرف سنائی دیتی ہیں، جو اللہ تعالیٰ کی بڑائی اور بندگی کے جذبے کی عکاسی کرتی ہیں۔
کراچی میں عیدالاضحیٰ روحانیت، عبادت، قربانی اور بھائی چارے کا حسین امتزاج سمجھی جاتی ہے جہاں نمازِ عید سے لے کر قربانی اور خیرات تک ہر عمل مذہبی اور سماجی اہمیت رکھتا ہے۔
شہریوں کو ہدایت کی گئی ہے کہ نمازِ عید کے لیے وقت سے پہلے مساجد اور عیدگاہوں کا رخ کریں کیونکہ بڑے اجتماعات کے باعث رش بڑھنے کا امکان ہے۔ ساتھ ہی یہ بھی واضح کیا گیا ہے کہ بعض مقامات پر نماز کے اوقات میں مقامی انتظامیہ یا مسجد کمیٹیوں کی جانب سے معمولی ردوبدل ممکن ہے اس لیے اپنے قریبی مرکز سے تصدیق ضرور کر لی جائے۔
دوسری جانب نیشنل ڈیزاسٹر مینجمنٹ اتھارٹی نے عیدالاضحیٰ کے دوران کراچی میں بارشوں سے متعلق الرٹ بھی جاری کیا ہے۔ تازہ پیش گوئی کے مطابق 30 اور 31 مئی کو کراچی سمیت سندھ کے مختلف اضلاع میں تیز ہواؤں کے ساتھ بارش کا امکان ظاہر کیا گیا ہے۔
ادارے نے متعلقہ حکام کو ہدایت کی ہے کہ نشیبی علاقوں میں ممکنہ پانی جمع ہونے اور ہنگامی صورتحال سے نمٹنے کے لیے پیشگی انتظامات مکمل رکھے جائیں۔
