9دن سے لاپتہ خاتون کا کچھ پتہ نہ چل سکا، پولیس حدود کے تنازعے میں اُلجھ گئی

اسلام آباد:شہر اقتدار میں تھانہ کھنہ کی حدود سے خاتون لاپتہ،لواحقین پریشان،وفاقی پولیس کی جانب سے حدود کا تنازعہ بناکر 9دن سے لواحقین کو ذلیل و خوار کیا جارہا ہے۔

تفصیلات کے مطابق لاپتہ خاتون کہ بیٹے ایشون نے ایم ایم نیوز سے گفتگو کرتے ہوئے بتایا کہ ہم تین بھائی ہیں اور تھانہ کی حدود گارڈن ٹاؤن ضیاء مسجد کے علاقے میں رہائش پذیر ہیں۔

میری والدہ سیکٹر ایف ایٹ فور میں سعودی شہری کے گھر کام کرتی تھی، 11-03-2021 رات دس بج کر تیس منٹ پر میرے فون نمبر میری والدہ کی کال آئی کہ مجھے سینٹورس مال کے گیٹ نمبر ایک پر سے آ کر لے جاؤ،میں نے کہا میں گھر پر ہوں، تو میری والدہ نے کہا کہ شکریال پل کے نیچے میرا انتظار کرو۔

جب میں شکریال پل کے نیچے پہنچا تو میری والدہ کا فون بند ہو چکا تھا میں تقریباً ایک گھنٹہ انتظار کرتا رہا لیکن میری والدہ نہ پہنچیں، ہم سب گھر والے پریشان ہوگئے اور والدہ کی تلاش شروع کردی لیکن والدہ کہیں نہیں ملیں۔

اسی دوران میرے کزن اوجی نے بتایا کہ میں بھی اسی سعودی کے گھر میں کام کرتا ہوں،تمہاری والدہ کا کچھ دنوں سے اسی سعودی کے ڈرائیور کے ساتھ کسی بات پر اختلاف تھا اور وہ تمہاری والدہ سے پیسے مانگتا اور دھمکیاں دیتا تھا۔

اس ڈرائیور کا نام خرم ہے جب ہم نے مقدمہ کے اندراج کے لیے درخواست تھانہ کھنہ پولیس کو دی تو کھنہ پولیس نے کہا کہ یہ وقوع تھانہ مارگلہ کا بنتا ہے تو انہوں نے ہمیں واپس تھانہ مارگلہ بھیج دیا۔

گزشتہ 9 دن سے ہم اسی طرح ذلیل و خوار ہو رہے ہیں،پولیس ہمارے ساتھ تعاون نہیں کر رہی، میں آئی جی پولیس اسلام آباد سے اپیل کرتا ہوکہ ہماری لاپتہ والدہ کی گمشدگی کی ایف آئی آر کاٹی جائے اور میری والدہ کو بازیاب کرایا جائے۔