راولپنڈی میں نان رجسٹرڈ سینٹر میں کورونا ویکسین لگوانے والوں کا ریکارڈ غائب

راولپنڈی :پنجاب میں کورونا ویکسی نیشن میں بے ضابطگیاں،راولپنڈی میں نان رجسٹرڈ ویکسین سینٹر کا انکشاف ، ایک ماہ سے ویکسین لگوانے والوں کا ریکارڈ غائب، نادرا سرٹیفکیٹ کے حصول میں مشکلات کاسامنا، شہریوں نے مشیر صحت سے نوٹس لینے کی اپیل کردی۔

ایک ماہ سے زائد عرصہ تک بڑی تعداد میں شہریوں کو ویکسین لگانے کے باوجود ابھی تک کسی بھی شہری کو نادرا کے ساتھ رجسٹرڈ نہیں کیا گیا اورکسی بھی شہری کی کمپیوٹرائزڈ رجسٹریشن بھی نہیں کی گئی ۔

یہ انکشاف اس وقت ہوا جب شہریوں نے ویکسین کی دوسری ڈوز لگوانے اور سرٹیفکیٹ حاصل کرنے کے لیے مذکورہ سینٹر سے رابطہ کیا تو شہریوں کو سینٹر پر موجود اہلکاروں نے جواب دیا کہ آپ کا ڈیٹا نادرا کے پاس رجسٹرڈ نہیں ہوسکا، یہ جواب سن کر تمام شہری پریشان ہوگئے۔

مزید پڑھیں:کورونا ویکسین کی شرط، نادرا کا سرٹیفکیٹ کیسے ملے گا ؟

شہریوں نے ایم ایم نیوز کو بتایا کہ ہمارے ساتھ دھوکہ ہوا ہے، جب ہم نے پہلی ویکسین کی ڈوز لگوائی تھی تو ہمیں اسی وقت رجسٹرڈ کیا جانا چاہیے تھا، ہم نے اپنی شکایت وزیراعظم پورٹل پر درج کرائی تو ڈپٹی کمشنر کے ذریعے پتہ چلا کہ ہمیں عارضی طور پر رجسٹرڈ کیا صرف عام سادہ کاغذ پر ہمارے شناختی کارڈز نمبرز اور نام لکھ کر رکھے گئے تھے اور بعد میں وہ تمام ڈیٹا ضائع کر دیا گیا ہے جس کی وجہ سے ہم بہت پریشان ہیں نہ تو ہمیں ویکسین لگوانے کا سرٹیفکیٹ ملا اور نہ ہی ابھی تک ویکسین کی دوسری ڈوز لگائی گئی ہے۔

اس سلسلے میں جب ایم ایم نیوز نے موقف کے لئے سینٹر پر موجود ڈی ڈی ایچ او ڈاکٹر نوید سے رابطہ کیا تو ڈاکٹر نوید نے بتایا کہ آن لائن سسٹم ڈاؤن ہونے کی وجہ سے بعض انٹریاں عارضی کی جاتی ہیں جنہیں بعد میں کمپیوٹرائزڈ ریکارڈ میں شامل کرلیا جاتا ہے۔

شہریوں کا کہنا ہے کہ ابھی تک ہماری انٹریاں نہیں کی گئیں، ہم وزیراعظم کے مشیر صحت سے مطالبہ کرتے ہیں کہ ہماری ویکسین کی انٹریاں کمپیوٹرائز کی جائیں اور دوسری ویکسین کی ڈوز لگانے کے بعد ہمیں نادرا کا سرٹیفکیٹ جاری کیا جائے۔