پولیس نے تحقیقات مکمل کرلی،افغان سفیر کی بیٹی کا اغواء ڈرامہ قرار

اسلام آباد:پولیس نے افغان سفیر کی بیٹی کے مبینہ اغواء کے حوالے سے تحقیقات مکمل کرتے ہوئے واقعہ کو ڈرامہ قرار دیدیا ہے۔

پولیس حکام کا کہنا ہے کہ افغان سفیر اور ان کی بیٹی نے تفتیش میں تعاون نہیں کیا،جب انہیں تفتیش کے لئے پولیس اسٹیشن بلایا گیا تو بتائے بغیر ہی پاکستان چھوڑ چکے تھے۔

سیف سٹی کیمروں ،گواہوں اور فوٹیج کے مطابق افغان سفیر کی بیٹی اسلام آباد میں آزادانہ گھومتی رہی،پولیس حکام کا کہنا ہے کہ لڑکی کے جھوٹ نے تفتیشی ایجنسیوں اور پولیس کو گمراہ کیا ،لڑکی کے خلاف مقدمہ درج کیا جاسکتا ہے۔

مزید پڑھیں:نور مقدم کاقاتل عادی مجرم،برطانیہ میں بھی کرمنل ریکارڈ مل گیا

پولیس حکام کا کہنا ہے کہ افغان سفیر کی بیٹی کا موبائل فون فرانزک انوسٹی گیشن ایجنسی کو تجزیہ کے لئے بھیجا گیا ہے جبکہ پولیس نے چاروں ٹیکسی ڈرائیوروں کے بیانات لینے اور تفتیش کے بعد انہیں رہا کردیا ہے۔

واضح رہے کہ کیس کے آغاز میں  پولیس کو دئیے گئے بیان میں افغان سفیر نجیب اللہ کی بیٹی کا کہنا ہے کہ میں اپنے بھائی کیلئے تحفہ لینے کیلئے گھر سے اکیلی پیدل نکلی۔ ایک ٹیکسی والے نے کہا کہ مجھے دکان کا پتہ ہے، میں اس کے ساتھ چلی گئی۔

بیان کے مطابق جب افغان سفیر کی بیٹی نے تحفہ خرید لیا تو واپسی کیلئے ایک ٹیکسی میں بیٹھی۔ 5 منٹ چلنے کے بعد ٹیکسی رک گئی اور ایک اور شخص ٹیکسی میں بیٹھ گیا۔ جب سلسلہ علی خیل نے شکایت کی تو اس شخص نے تشدد کیا تاہم پولیس حکام نے واقعہ کی تحقیقات مکمل کرتے ہوئے اغواء کو ڈرامہ قرار دیدیا ہے۔