بھارت، طیارے کی کریش لینڈنگ،پائلٹوں سمیت20 افرادہلاک

نئی دہلی:بھارت کی ریاست کیرالہ میں مسافر طیارے کی کریش لینڈنگ میں دو پائلٹوں سمیت 20 افراد ہلاک جبکہ 140 افراد زخمی ہو گئے، 40 کے قریب مسافروں کی حالت تشویشناک ہے۔ وزیراعظم عمران خان نے واقعے پر افسوس کا اظہار کیا ہے۔

بھارتی میڈیا کے مطابق ریاست کیرالہ کے کالی کٹ ایئرپورٹ پر بھارتی مسافر طیارہ کریش لینڈنگ کے رن وے سے دوران پھسل کر آبادی میں گھس گیا، حادثے میں 20 افراد ہلاک ہوگئے۔ حادثے میں پائلٹ کے معاون بھی چل بسے ہیں۔

حادثے کا شکار ہونے والی ایئر انڈیا کی ایکسپریس پرواز آئی ایکس 1344 جمعے کی شام دبئی سے کالی کٹ کے کوئیکوڈ ہوائی اڈے پہنچی تھی اور ایئر انڈیا کے ترجمان کے مطابق خراب موسم میں اترتے ہوئے طیارہ رن وے سے پھسل کر نیچے جا گرا۔

انڈین ذرائع ابلاغ پر دکھائے جانے والے مناظر میں بوئنگ 737 طیارے کو ٹکڑے ٹکڑے ہوئے دیکھا جا سکتا ہے۔بھارتی میڈیا کا کہنا ہے کہ کریش لینڈنگ کے دوران طیارہ ٹوٹ کر دو حصوں میں تقسیم ہوگیا ہے، جبکہ حادثے کے مقام پر مکانات کو بھی نقصان پہنچا ہے۔

Just in: #AirIndia Express aircraft from Dubai to Calicut with 191 passengers crashes after overshooting the runway and going into the valley. Fire tenders and ambulances rushed to the spot.
– @jagritichandra reports

Courtsey- Airport source pic.twitter.com/8vx3WYIsmd

— The Hindu (@the_hindu) August 7, 2020

خبرایجنسی رائٹرز کے مطابق سول ایوی ایشن وزارت کا کہنا تھا کہ ایئرانڈیا کا جہاز دبئی سے پہنچا تھا جس میں عملہ اور 191 افراد سوار تھے اور جنوبی شہر کیلی کٹ میں بارش کے دوران لینڈنگ کرتے ہوئے حادثے کا شکار ہوا۔

حکام کے مطابق حادثے میں دو پائلٹوں سمیت 20 افراد ہلاک ہو چکے ہیں جبکہ 140 افراد زخمی ہیں، 40 افراد کی حالت تشویشناک بتائی جا رہی ہے جنہیں ہسپتال میں طبی امداد دی جا رہی ہے۔

خبر رساں ادارے اے این آئی نے سول ایوی ایشن کے ڈائریکٹر جنرل کے حوالے سے خبر دی ہے کہ طیارہ لینڈنگ کے دوران رن وے پر رک نہیں سکا اور وادی میں گر کر دو ٹکڑے ہو گیا۔

بھارتی وزیراعظم نریندرا مودی نے حادثے پر افسوس ظاہر کرتے ہوئے ٹویٹ کیا کہ مجھے امید ہے زخمی افراد جلد صحتیاب ہو جائیں گے۔ میں نے صورتحال پرکیرالہ کے وزیر اعلیٰ پینا رائی وجے یان سے رابطہ کیا ہے اور حکام جائے وقوعہ پر موجود ہیں اور متاثرین کو مدد فراہم کر رہے ہیں۔