بی ایم جی کے تمام 15 امیدوار کراچی چیمبر کے انتخابات میں بلا مقابلہ کامیاب

کراچی :کے سی سی آئی کی منیجنگ کمیٹی کے انتخابات برائے سال22-2021کیلئے بزنس مین گروپ (بی ایم جی) کے تمام امیدوار بلا مقابلہ منتخب ہو گئے ہیں۔

الیکشن کمیشن کو مجموعی طور پر30 اُمیدواروں کے کاغذات نامزدگی موصول ہوئے جن کا تعلق بزنس مین گروپ سے ہے۔ الیکشن کمیشن نے تمام کاغذاتِ نامزدگی کی جانچ پڑتال کے بعد 12 اُمیدواروں کے کا غذات نامزدگی کو مسترد کردیا گیا جبکہ مزید 3 اُمیدواروں نے اپنے کاغذات واپس لے لئے، جس کے نتیجے میں باقی رہ جانے والے 15 اُمیدواروں کا بلامقابلہ انتخاب ہوا۔ 

بی ایم جی کے تمام15 امیدوار کراچی چیمبر آف کامر س کے انتخابات برائے سال 2021-22میں کامیاب قرار پائے۔

بزنس مین گروپ کے چیئرمین اور سابق صدر کے سی سی آئی زبیر موتی والا نے رب تعالیٰ کا شکر ادا کرتے ہوئے کراچی کی تاجرو صنعتکار برادری کا شکریہ ادا کیا ہے جنہوں نے بی ایم جی پر ہمیشہ بھرپور اعتماد کا اظہار کیا۔

مزید پڑھیں:آئی ایم ایف پاکستان کو 2 ارب 77 کروڑ ڈالر کا غیر مشروط قرض آج جاری کرے گا

انھوں نے کہاکہ 24 ویں سال مسلسل کامیابی بی ایم جی کی عوامی خدمت کا ثمر ہے اور یہ واضح کرتا ہے کہ تاجروصنعتکاروں کی اکثریت بی ایم جی کی پالیسیوں سے اتفاق کرتی ہے کیونکہ وہ جانتے ہیں اور انہیں اس بات پر مکمل یقین ہے کہ بزنس مین گروپ ہی ان کی بہتر خدمت کرسکتا ہے۔

چیئرمین بی ایم جی نے اس امید کا اظہار کیا کہ بی ایم جی کے نومنتخب نمائندے تمام صلاحیتوں کو بروئے کار لاتے ہوئے تاجر وصنعتکار برادری کی بھرپور خدمت کریں گے اور بی ایم جی کے پبلک سروس کے مقصد کے حصول کے لیے تمام وسائل بروئے کار لائیں گے۔

بی ایم جی کے کامیاب امیدواروں میں محمد ادریس،توصیف احمد، عبدالرحمن نقی، حاجی آصف، شعیب احمد فریدی، محمد عاصم اعجاز، محمد عارف، ناصر ریاض، ابوبکر صدیق احمد شمسی، آصف یونس، شیخ وسیم احمد، ضیاء العارفین، محمد فرحان اشرفی، محمد عامر چھرہ اور شمیم احمد شامل ہیں۔

جیسا کہ مینجنگ کمیٹی کہ تمام ارکان بلا مقابلہ منتخب ہوچکے ہیں لہذا 18 ستمبر 2021 کو مینجنگ کمیٹی انتخابات نہیں ہوں گے جبکہ کراچی چیمبر کے عہدیدران برائے سال 2021-22 کے لیے انتخابات 23 ستمبر2021 کو منعقد ہوں گے۔