جلسے سے پہلے مسلم لیگ ن کے کارکنوں کی گرفتاری لاہور ہائیکورٹ میں چیلنج

لاہور :پاکستان مسلم لیگ (ن) کے کارکنوں کی گرفتاری کو جمعرات کے روز لاہور ہائیکورٹ میں چیلنج کردیا گیا۔ درخواست مسلم لیگ (ن) کے وکلاء فورم نے درخواست میں حکومت پنجاب ، آئی جی پولیس اور سیکریٹری داخلہ کو فریق بنایا ہے۔

درخواست میں کہا گیا ہے کہ 16 اکتوبر کو گوجرانوالہ ریلی کی وجہ سے مسلم لیگ ن کے کارکنوں کو گرفتار کیا جارہا ہے ۔ مقامی انتظامیہ نے مسلم لیگ (ن) کے قافلوں کو روکنے کے لئے راستے بھی بند کردیئے ہیں۔

دوسری جانب حزب اختلاف کی بڑی جماعتوں کے اتحاد پاکستان ڈیموکریٹک موومنٹ کو 16 اکتوبر کو جناح اسٹیڈیم گوجرانوالہ میں جلسہ عام کرنے کی اجازت دیدی گئی ہے۔

فیصلہ ضلعی انتظامیہ اور پی ڈی ایم کی مرکزی قیادت کے مابین طویل میٹنگ کے بعد کیا گیا۔ ضلعی انتظامیہ اور پی ڈی ایم رہنماؤں کے مابین شہر میں حزب اختلاف کی جماعتوں کی جلسہ عام کے لئے 28 نکاتی معاہدہ طے پایا۔

مزید پڑھیں:اپوزیشن جلسہ کرپشن بچاؤ مہم کا مجمع، جناح اسٹیڈیم بھر کے دکھائیں۔شبلی فراز کا چیلنج

اجلاس کے دوران اس بات پر بھی اتفاق کیا گیا کہ عوامی اجلاس کے دوران اپوزیشن کورونا کے پھیلاؤ پر قابو پانے کے لئے قائم کردہ معیاری آپریٹنگ طریقہ کار کی سختی سے پیروی کریگی۔